काठमाडौं – भारतको स्वतन्त्रता दिवसको अवसरमा बुधवार सार्वजनिक भएको 'गोल्ड' फिल्म सन् १९४८ मा लन्डन ओलम्पिकमा भारतको जीतबाट प्रेरित छ । भारत स्वतन्त्र भएको एक वर्षपछि यो जीत हासिल भएको थियो । एक
स्वतन्त्र देशका रूपमा खेलेर जितेकोमा भारतीय खेलाडीहरू गर्वको अनुभव गरेका थिए । 

फिल्मको कथा भन्नुपर्दा - तपन दास (अक्षय कुमार) इन्डिया टीमका व्यवस्थापक हुन् । रक्सी पिउने बंगाली दास स्वतन्त्र भारतका लागि स्वर्ण पदक ल्याउने धुनमा छन् । फिल्म सन् १९३६ मा पुग्छ । त्यतिखेर टीमका कप्तान सम्राट् (कुणाल कपूर) हुन्छन् । त्यतिखेर टीमले ब्रिटिश शासनअन्तर्गत हकी म्याचमा गोल्ड जित्छ । दास त्यतिखेर पनि टीम व्यवस्थापक थिए र उनी इन्डियाको साटो ब्रिटिश झण्डा फहराइएको चित्त बुझाउँदैनन् । 

दास टीम इन्डिया फेरि ओलम्पिकमा भाग दिन गइरहेको थाहा पाएपछि टीमलाई गोल्ड जिताउन लागिपर्छन् । टीम खडा गरेर गोल्ड जिताउने जिम्मेवारीलाई उनी एक चुनौतीका रूपमा लिन्छन् । 

खेलकुदको फिल्ममा संघर्ष, हार अनि अन्तिममा जीत देखाइन्छ । गोल्डमा पनि यही हुन्छ । 

निर्देशक रीमा कागतीले सन् १९४० को दशकलाई देखाउनका लागि मिहिन कोशिश गरेको देखिन्छ र उनी त्यसमा सफल पनि भएकी छन् । तर अरू ठाउँमा उनी असफल छिन् । 

भारतीय हकी जगतको ऐतिहासिक अध्यायलाई धेरै चलाउने हुँदा मेलोड्रामा बनेको छ जसमा खेलको मर्म देखिँदैन । 

रीमा र राजेश देवराजले फिल्मको कथा र पटकथामा देशभक्ति र राष्ट्रियताका हरेक पक्षलाई छुने कोशिश गरेका छन् । फिल्म तीन घन्टा लामो छ । 

जावेद अख्तरका संवाद धेरै ठाउँमा असरदार छन् । तर संवाद अलि बढी नै छन् । फिल्ममा कतिपय कुरा अति नै सरलीकरण गरिएकाले बच्चाको फिल्म हेरिरहेको अनुभूति हुन्छ । 

अक्षय कुमारले राम्रो अभिनय गरेका छन् । उनी तपन दासको चरित्रमा घुसेका छन् । अन्य कलाकार कुणाल कपूर, विनीत सिंह, अमित साध र सनी कौशलको पनि काम राम्रो छ । सनीले हिम्मत सिंहका रूपमा दमदार अभिनय
गरेका छन् ।

तर यही फिल्मबाट डेब्यु गरेकी टीभी कलाकार मौनी रोयले प्रभावित गर्नुको साटो इरिटेट गर्छिन् । उनले फिल्ममा अभिनय गर्ने स्कोप नै छैन । 

'तलाश' जस्तो इन्टेन्स फिल्म बनाएकी रीमाबाट अलि बढी नै अपेक्षा थियो । पहिलो हाफ सुस्त छ भने दोस्रो हाफले बढी इन्भल्भ गराउँछ । क्लाइमेक्स राम्रो छ । 

स्पोर्ट्स ड्रामा मन पराउनुहुन्छ अनि अक्षय कुमारको प्रशंसक हुनुहुन्छ भने फिल्म हेर्न सक्नुहुन्छ ।

फिल्म : गोल्ड
स्टारकास्ट : अक्षय कुमार, मौनी रोय, विनीत सिंह, सनी कौशल, अमित साध, कुणाल कपूर
निर्देशक : रीमा कागती
निर्माता : फरहान अख्तर, रितेश सिधवानी
रेटिङ : ३/५
 

दैनिक भास्करमा प्रकाशित शुभा शेट्टी साहाको समीक्षा