काठमाडौं – प्रमुख सत्तारुढ दल नेपाल कम्युनिस्ट पार्टी (नेकपा) संसदीय दलका मुख्य सचेतक देवप्रसाद गुरुङले स्थानीय तहले उठाएको करको विषयलाई ‘तिललाई पहाड’ बनाइएको दाबी गरेका छन् ।

स्थानीय तहले काम शुरू गरेको संक्रमणकालीन समयमा करको विषयलाई अतिरञ्जित गर्न जरुरी नरहेको उनको दाबी छ ।

‘स्थानीय तहबाट उठाइएको करलाई संक्रमणकालीन समयमा अतिरञ्जित गर्नुहुँदैन । तिललाई पहाड बनाउनु हुँदैन,' गुरुङले भने– 'प्राकृतिक स्रोत साधन आयोग गठन गरेर कर प्रणालीको बारेमा आयोगको सिफारिसका आधारमा एकरूपता ल्याउनुपर्छ ।'

नेकपाकै दलबहादुर राना लगायतका सांसदहरूले पनि स्थानीय तहको करको विषयमा सरकारको बचाउ गरेका थिए ।

नेकपाकै नवराज सिलवालले स्थानीय करको विषयमा लोकतन्त्र र संघीयतालाई बदनाम गर्ने ढंगले प्रचार भइरहेको गुनासो गरे । 

कांग्रेसका पद्मनारायण चौधरीले करको भार जनतालाई थोपर्नु गलत भएको बताए ।