काठमाडौं — इस्तानबुलमा साउदी अरबको वाणिज्य दूतावासमा पत्रकार जमाल खशोग्गीको हत्यासम्बन्धी सनसनीपूर्ण खबर आएको छ ।

त्यस दिनको सीसीटीभी फूटेजले पत्रकार हत्यापछि भ्रम उत्पन्न गर्नका लागि अपनाइएको तरिकाको बारेमा थाहा हुन्छ । 

सन् २०१८ को अक्टोबर २ तारिखको बिहान ११ बजेर ३ मिनेट जाँदा शर्ट र जीन्स लगाएको एक व्यक्ति आफ्ना केही साथीहरूसँग दूतावासमा पसेको देखिन्छ । दुई घन्टापछि दिउँसो सबा १ बजे पत्रकार खशोग्गी दूतावासमा पस्छन् र
केही मिनेटभित्र हत्याको खेल खेलिन्छ । 

न्युयोर्क टाइम्सका अनुसार, त्यस दिन वाणिज्य दूतावासभित्र पसेको दुई मिनेटमै खशोग्गीमाथि आक्रमण गरिएको थियो र सात मिनेटभित्र उनको मृत्यु भयो । त्यसपछि २२ मिनेटभित्र उनको शरीरलाई टुक्राटुक्रा पारियो । खशोग्गीको
हत्या गर्नैका लागि त्यहाँ आएको साउदी टोली आफ्ना काम सकेर दुई घन्टाभित्र त्यहाँबाट हिँड्यो ।

सीसीटीभीबाट प्रस्ट हुन्छ, साउदी अरबका हत्याराहरूले भ्रम उत्पन्न गर्नका लागि खशोग्गीको बडी डबल अर्थात् नक्कली व्यक्ति ल्याएका थिए । हत्यापछि तिनै व्यक्तिलाई खशोग्गीको लुगा लगाइयो । खशोग्गी दूतावासबाट निस्केको
भ्रम दिलाउन यो प्रपञ्च रचिएको थियो । 

केही समयसम्म त हत्यालाई ढाकछोप गरियो तर एउटा जुत्ताले सबै पोल खोलिदियो । 

टर्कीका अधिकारीहरूले जारी गरेको भिडियोमा खशोग्गी जस्तो देखिने व्यक्ति उनको हत्याको लगत्तै पछि इस्तानबुलको सडकमा घुमिरहेको देखिन्छ । केही समयपछि उसले खशोग्गीको कपडा खोल्यो । 

खशोग्गीको कपडा लगाउने व्यक्ति उनीजस्तै देखिन्छ । चश्मा र दाह्री पनि उनकै जस्तो छ । उमेर र शरीर हेरेर कसैले पनि यो खशोग्गी हैन भन्न सक्दैन । तर जुत्ताले दुई फरक व्यक्ति हुन् भन्ने खुलाइदिन्छ । 

अनि प्रश्न उठ्न थाल्यो, यिनै पत्रकार खशोग्गी हुन् भने जुत्ता किन खोलेनन् । यी खशोग्गी हैनन् भने उनको कपडा लगाएर दूतावासबाहिर आउने व्यक्ति को हो ?

नक्कली व्यक्ति मुस्तफा अल मदनी भएको बताइएको छ । उनी साउदी जाँच टोलीका एक सदस्य थिए र खशोग्गीलाई मार्नका लागि दूतावास पठाइएको टोलीमा थिए । मदनी ५७ वर्षका भए । 

मुस्तफा दूतावासभित्र जाँदा उसको दाह्री थिएन । उसले अर्कै कपडा लगाएको थियो । उसले स्पोर्ट्स शु लगाएको थियो । तर उसले खशोग्गीको कपडा त लगायो र दाह्री पनि टाँस्यो तर जुत्ता बदल्न बिर्सेछ । स्पोर्ट्स शु नै लगाएर ऊ
बाहिर निस्कियो जबकि खशोग्गीले छालाको कालो जुत्ता लगाएका थिए । त्यही फूटेजले खशोग्गी हत्यामा टर्कीका अनुसन्धानकर्तालाई महत्त्वपूर्ण प्रमाण दिएको थियो ।

एजेन्सी