सुर्खेत– जिल्ला प्रहरी कार्यालय सुर्खेतले दशैं र तिहारकोबीचमा ६ ओटा जुवाखालबाट ८ लाख ७८ हजार ६६३ रुपैयाँ बरामद गरेको छ ।

घटस्थापनादेखि कात्तिक २५ गतेसम्म ३८ जना जुवाडेलाई नियन्त्रणमा लिइएको जिल्ला प्रहरी कार्यालय सुर्खेतका प्रमुख प्रहरी उपरीक्षक बसन्त रजौरेले जानकारी दिए । रजौराका अनुसार जिल्ला प्रहरी कार्यालय सुर्खेतले जुवा विरुद्ध सशक्त अप्रेसन चलाएको थियो । 

‘जिल्लामा शान्ति सुव्यवस्था दशैं र तिहारको बीचमा असाध्यै राम्रो रह्यो’ एसपी रजौरेले भने, ‘कडा सुरक्षा व्यवस्थाका कारण सुर्खेतमा यो वर्ष अप्रिय घटना भएनन् ।’ उनले घरायसी मदिरा, पटाखा, लागुऔषध दुव्र्यसनी, जुवालाई विशेष टार्गट गरेर जिल्ला प्रहरी कार्यालय सुर्खेत खटिएको बताए । ‘हामीले सुर्खेतको वातवरणलाई शान्तिपूर्ण बनाईराख्न विभिन्न अभियानहरु समेत सञ्चालन गरेका थियौं’ उनले भने, ‘सबैबाट सकारात्मक सहयोग पाइएको कारण दशैं र तिहार पर्वलाई शान्तिपूर्ण बनाउन हामी सफल भयौं ।’

यता, जिल्ला ट्राफिक कार्यालय सुर्खेतले चालु आर्थिक वर्ष २०७५/०७६  कार्तिक २४ गते सम्म ६ हजार ७६१ लाई कारवाही गरिएको जनाएका छ । कारवाहीबाट कार्यालयले राजश्व वापत ४० लाख २८ हजार संकलन गरेको छ । जिल्ला ट्राफिक प्रहरी कार्यालय सुर्खेतका प्रमुख तथा प्रहरी निरीक्षक हरिबहादुर बिसीका अनुसार गत आर्थिक बर्ष २०७४/०७५ को  सवारि कारबाही संख्या १४ हजार ९९४ रहेको थियो भने राजश्व  ८७ लाख ७३ हजार राजश्व संकलन भएको थियो ।

दशैं तिहारमा सुर्खेतमा दुई जनाले सवारी दुर्घटनमा परेर ज्यान गुमाएका छन् । प्रहरी निरीक्षक विसीका अनुसार ७ जना गम्भीर घाइते भएका थिए  । गत वर्षको तुलनामा ठूला दुर्घटना दुई ओटा घटे भने सामान्य दुर्घटना २४ ओटा घटेका छन् । ‘दशैं र तिहारको अवधिमा २ हजार ४०८ सवारी साधनलाई कारवाही गरिएको थियो । त्यसबाट १३ लाख ८३ हजार पाँचसय राजश्व जम्मा भएको छ’ प्रहरी निरीक्षक विसीले भने, ‘दशैं तिहारको अवधिमा ७२ जना मापसेमा परेका थिए । ती मध्ये १५ जनाको मोटरसाईकल नियन्त्रणमा नै राखेका छौं ।’

उनका अनुसार कार्यालयले सवारी चालक, सर्वसाधारण यात्रुलगायतलाई जनचेतनामुलक कक्षा पनि दिएको छ । ‘हामीले दुर्घटना न्यूनीकरण गर्न विभिन्न ठाँउमा प्रशिक्षण कार्यक्रमहरु आयोजना गरेका थियौं’ उनले भने, ‘चालु आर्थिक वर्षमा हामीले त्यस्ता कार्यक्रमहरु ८२ पटक गरेका छौं । र यो कार्यक्रमबाट ३१६१ जना लाभान्वित भएका छन् ।’ 

जिल्ला प्रहरी कार्यालय सुर्खेतले आइतबार दशैं र तिहारको बेला बरामद गरिएको पटाखालाई डिस्पोज गरेको छ । दशैं र तिहारका समयमा विभिन्न स्थानबाट फेला परेको पटखा डिस्पोज गरिएको हो ।