काठमाडौं — भारतको हरियाणास्थित पञ्चकुलामा भएको रेस्लिङको बिग फाइटमा विदेशी महिला रेस्लरबाट पछारिएकी राखी सावन्त बदला लिन चाहन्छिन् ।

आइतवार पञ्चकुलामा ग्रेट खली रिटर्न शोमा नाच्दै गर्दा राखीलाई विदेशी रेस्लरले उचालेर पछारिदिएकी थिइन् । त्यसपछि राखी अस्पताल जानुपरेको थियो । 

राखीले मंगलवार रेस्लर खलीसँग विदेशी रेस्लरविरुद्ध बदला लिनका लागि आग्रह गरिन् । असह्य पीडामा रहेकी राखीलाई अस्पतालबाट ह्वीलचेयरमा राखेर होटलमा ल्याइएको थियो । 

होटलमा खाटमा पल्टीपल्टी उनले पत्रकारहरूसँग कुरा गरिन् । राखीले भनिन्, ‘किन यस्तो भयो मलाई नै थाहा छैन । म त द ग्रेट खलीको शोमा आएकी हुँ । पञ्चकुलामा मैले प्रस्तुति पनि दिएको हो । त्यो विदेशी रेस्लरलाई कुन भूत चढ्यो कुन्नि ? उसले मलाई केही मिनेटसम्म त हावामै उल्टो झुण्ड्याएर राखी । मेरो त होशै गुम्यो अनि उसले मलाई भुइँमा बेस्सरी पछारी । मेरो त ढाड, पेट र नितम्बमा चोट लागेको छ । त्यो बहुलाही हो । म त्यससँग बदला लिन चाहन्छु ।’

राखीले भनिन्, ‘यो दुर्घटना कसैले षड्यन्त्र गरेकाले भएको हो । बाबा राम रहीमको क्षेत्रमा रहेकाले उनकै षड्यन्त्र हो कि ? तनुश्री दत्ताले षड्यन्त्र गरेकी हो कि ? मलाई गोदिएला भन्ने लागेकै थिएन ।’

जनताले त यसलाई पब्लिसिटी स्टन्ट भनिरहेका छन् त भनी पत्रकारले सोध्दा राखीले जवाफ फर्काइन्, ‘राखी सावन्त मरी भने पनि मानिसलाई पब्लिसिटी स्टन्ट नै लाग्छ । राखी र खलीलाई पब्लिसिटी गरिरहनुपर्ने के आवश्यकता छ र
?’

एजेन्सी