काठमाडौं — बेलायतकी प्रधानमन्त्री टेरिजा मेले बुधवार बेलुका पार्टीमा अविश्वासको प्रस्ताव सामना गर्ने भएकी छन् । 

प्रधानमन्त्री कार्यालय डाउनिङ स्ट्रीटमा एक वक्तव्य जारी गर्दै भनिन्, ‘म अविश्वास प्रस्तावको सामना गर्न तयार छु ।’

नयाँ प्रधानमन्त्रीले धारा ५० लाई कि त खारेज गर्नुपर्ने कि त बढाउनुपर्ने उनले बताइन् । त्यसो गर्दा ब्रेक्जिटमा कि त ढिलाइ हुन्छ कि त ब्रेक्जिट नै हुँदैन । बेलायतलाई युरोपेली संघबाट बाहिर निकाल्नका लागि धारा ५० आवश्यक हुन्छ ।

कन्जर्भेटिभ पार्टीको नेता परिवर्तन गर्दा बेलायतको भविष्य जोखिममा पर्ने र अनिश्चितता छाउने मेले बताइन् । यो समयमा यस्तो अवस्था देशले धान्न नसक्ने उनको भनाइ छ । 

मेलाई कन्जर्भेटिभ पार्टीको नेतृत्वबाट हटाउने प्रस्तावका लागि आवश्यक गणपूरक संख्या ४८ पुगेको छ ।

बेलायतले युरोपेली संघबाट निस्कने जनमत संग्रहमा मत दिएको केही समयपछि प्रधानमन्त्री बनेकी मेले ब्रेक्जिटका सम्बन्धमा बनाएको योजनाका कारण उनकै दलभित्र आलोचना भएको छ । 

अविश्वासको प्रस्तावमा गोप्य मतदानको परिणाम कति छिटो सार्वजनिक होला भन्ने कुरा प्रस्ट भइसकेको छैन । तर अविश्वास प्रस्तावलाई परास्त गर्नका लागि मेले बहुमत हासिल गर्नुपर्ने हुन्छ । 

प्रस्तावलाई हराएमा मेविरुद्ध कम्तीमा एक वर्षसम्म अर्को अविश्वास प्रस्ताव ल्याउन पाइनेछैन । 

मेले अविश्वासको प्रस्तावमा पराजय भोगेमा उनी नेतृत्वमा हुने प्रतिस्पर्धामा उठ्न पाउने छैनन् । 

तर मेले साँघुरो मतले जितिन् नै भने पनि पार्टी नेतृत्वबाट हट्ने निर्णय लिन सक्छिन् । 

तल्लो सदनमा कन्जर्भेटिभ पार्टी सबभन्दा ठूलो दल भएकाले पार्टीको नेतृत्वमा रहेको व्यक्ति नै प्रधानमन्त्री बन्ने अपेक्षा गरिन्छ । 

मेलाई कन्जर्भेटिभ पार्टीको नेतृत्वबाट हटाइएमा उनी कामचलाउ प्रधानमन्त्रीका रूपमा बस्ने अपेक्षा छ । पार्टीले नयाँ नेता नछानुन्जेल उनी कामचलाउ प्रधानमन्त्री हुन सक्छिन् । यो प्रक्रिया पूरा हुन ६ हप्ता लाग्न सक्छ । 

बीबीसीबाट