काठमाडौं– काठमाडौंको त्रिपुरेश्वरस्थित कम्पनी रजिष्ट्रारको कार्यालयमा करार सेवामा कार्यरत कम्प्युटर अपरेटर पूर्णचन्द्र आत्रेयविरुद्ध भ्रष्टाचार मुद्दा दर्ता भएको छ । 

कम्पनीमा कायम रहन आएका शेयरधनीहरुको शेयर लगत अभिलेख तथा कम्पनी अद्यावधिक गर्ने कामका लागि आत्रेयले सेवाग्राहीसँग घुस लिएका थिए । 

आत्रेयले घुस मागेको भन्ने पूर्वसूचनाअनुसार अख्तियार दुरुपयोग अनुसन्धान आयोगको टंगालस्थित कार्यालयबाट खटिएको टोलीले उनलाई नियन्त्रणमा लिएको थियो । 

अख्तियारले कम्पनी रजिष्ट्रारको कार्यालयमा बिचौलियाको काम गर्ने सरिता कार्कीलाई पनि पक्राउ गरेको छ । अख्तियारले बिहीवार दुवैजनाविरुद्ध जनही ७ हजार रुपैयाँ बिगो र जरिवाना दावी गर्दै विशेष अदालतमा मुद्दा दायर गरेको छ ।