काठमाडौं — भारतका प्रसिद्ध हास्यकलाकार कपिल शर्मा र सुनिल ग्रोवरका प्रशंसकहरू उनीहरूबीचको मनमुटाव अन्त्य भएर एकसाथ आए हुन्थ्यो भनी कामना गरिरहेका छन् । 

कपिलको शोको दोस्रो सीजन चलिरहेको छ र उनले धमाका मच्चाइरहेका छन् । तर यस शोमा सुनिललाई देख्नका लागि प्रशंसकहरूले अझै प्रतीक्षा गर्नुपर्नेछ । शोका प्रोड्युसर सलमान खानले दुवैका बीच मध्यस्थता गराउन खोजेका छन् । 

सुनिल आजकल सलमान खानको आगामी फिल्म भारतको शूटिङको अन्तिम शेड्युलमा व्यस्त छन् । त्यहाँ उनी आगामी डेढ महिना व्यस्त हुने देखिएको छ । 

तर भारतको शूटिङ सकिएपछि भने सुनिलले कपिलको शोमा रिएन्ट्री गर्ने सम्भावना रहेको केही रिपोर्टहरूमा उल्लिखित छ । तर यस विषयमा सोनी च्यानलले वा सलमानले वा कपिल र सुनिलले कुनै बयान दिएका छैनन् । 

दुई हास्यकलाकारबीचको दूरी सामाजिक सञ्जालमा केही कम भइरहेको देखिएको छ । सुनिलले कपिलकी आमालाई सामाजिक सञ्जालमा जन्मदिनको शुभकामना दिए । अनि कपिलकी पत्नीलाई पनि उनले बिहेको बधाई दिइसकेका छन् । प्रशंसकहरू यी दुईबीचको मतभेद अन्त्य भएर सँगै काम गरेको हेर्ने आशा गरिरहेका छन् । 

एजेन्सी