काठमाडौं – विदेशमा काम गरेर फर्कने नेपाली कामदारमाथि त्रिभुवन अन्तराष्ट्रिय विमानस्थलमा हुने दुव्र्यवहारप्रति संसदमा आवाज उठेको छ ।

प्रतिनिधि सभाको शुक्रवार बसेको बैठकको विशेष समयमा नेपाली कांग्रेसका अत्तर कमाल मुसलवानले नेपाली श्रमिकमाथि विमानस्थलमा हुने दुव्र्यवहारबारे सरकारको ध्यानाकर्षण गराएका हुन् ।

‘विदेशमा गएका श्रमिकहरूले एउटा फोन ल्याउँदा, घरायसी सामान ल्याउँदा उनमाथि जुन व्यवहार अगरिएको छ, रेमिट्यान्सले चलेको देशमा एउटा श्रमिकमाथि शोषण र व्यापारीमाथि मालामाल हुने जुन व्यवस्था गरिएको छ, यसको अन्त्य हुनुपर्छ,’ उनले भने । 

पछिल्ला दिनमा विमानस्थलमा विदेशबाट फर्किने नेपाली कामदारमाथि कडाइ गरिएको छ । नेपाल सरकारले चालू आर्थिक वर्षदेखि लागू गरेको भन्सार शुल्क सम्बन्धी नयाँ नियमले प्रवासी नेपाली मारमा परेको भन्दै प्रतिपक्षीले मात्र नभइ विभिन्न सरोकारवालाले पनि आपत्ति जनाएका छन् ।

विदेशबाट फर्किंदा ल्याउन पाइने केही वस्तुलाई प्रतिबन्ध गर्दै झिटीगुन्टा आदेशमा संशोधनमार्फत् सुन, मदिरा र समदर भन्सार लगायतका व्यवस्थामा महत्त्वपूर्ण परिवर्तन गरेर भन्सारमा कडाइ गरेको थियो ।

श्रमिकले दुःख गरेर ल्याएको सामान जफत गरेर लिलामीमा राखेर सरकारले उपलब्धीको रूपमा प्रचार गर्नु राम्रो नभएको प्रवासी नेपालीको गुनासो छ । बरू जफत गर्नुको सट्टा तोकिएको न्यूनतम भन्सार शुल्क लगाएर ती सामान छोड्नुपर्ने आवाज उठ्दै आएको छ ।

चालू आर्थिक वर्षमा लागू भएको नयाँ झिटीगुन्टा आदेशले ल्यापटप वा कम्प्यूटर, ट्यावलेट, घडी, क्यामरा, भिडियो क्यामरा, सेलुलर, मोबाइल फोन र पेन ड्राइभ १–१ थानभन्दा बढी ल्याउन पाइने छैन । तोकिएकोभन्दा बढी परिणाममा सामान ल्याए विमानस्थलमा जफत गरिन्छ ।