काठमाडौं- नेपालकी प्रथम नायिका भुवन चन्दले निर्माण गरेको फिल्म ‘साइनो’को पहिलो गीत सार्वजनिक गरिएको छ ।

सोमबार राजधानीमा एक कार्यक्रमकाबीच ‘मायालुलाई जात्रैमा भेटियो’ बोलको लोकलयको गीत सार्वजनिक गरिएको हो ।

आकर्षक सेटअपमा छायाँकन गरिएको गीतमा फिल्मका मुख्य कलाकार राजकुमार र मिरुना मगरले नृत्य गरेका छन् । चेतन कार्कीको शब्द, बसन्त सापकोटाको संगीत रहेको गीतमा प्रताप दास र मेलिना राईको स्वर छ । भिडियोमा रामजी लामिछानेको कोरियोग्राफी छ । त्रिकोणात्मक प्रेमकथामा निर्मित फिल्मलाई रमेश थापाले निर्देशन गरेका हुन् । फिल्मको कार्यकारी निर्मातामा शरण थापा छन् ।

फिल्ममा नीता ढुंगाना, मिरुना मगर, राजकुमार, भुवन चन्द, बसुन्धरा भुसाल, मदनदास श्रेष्ठ, रोयदीप श्रेष्ठ, श्याम राई, शिखा मल्ल, राजाराजेन्द्र पोखरेल, विशाल पहाडी लगायतको अभिनय छ । 

अभिमन्यू ‘निरवी’को कथा रहेको फिल्मलाई रामेश्वर कार्कीले खिचेका हुन् । वान नेपाल एक्सन टिमको द्वन्द्व रहेको फिल्मलाई बनिश शाहले सम्पादन गर्नेछन् । आउँदो वर्षको जेठ १० गतेलाई प्रदर्शन मिति घोषणा गरिएको यो फिल्म झण्डै एक दशक अगाडिको सुपरहिट फिल्म ‘साइनो’ को नाम सापटी लिएर निर्माण गरिएको हो ।