कोरोना भाइरस (कोभिड–१९) महामारीकाविरुद्ध उपचाररत चिकित्सकहरू स्वास्थ्य सामग्रीको जोहो गर्ने काममा पनि केन्द्रित भएका छन् । राष्ट्रिय चिकित्सक संघमा आवद्ध यहाँका चिकित्सकहरूले मित्रराष्ट्र जनवादी गणतन्त्र चीनको कान्सु प्रान्तसँगको सहकार्यमा जुटाएको स्वास्थ्य सामग्री मंगलबार प्रदेश सरकारलाई हस्तान्तरण गरेका छन् ।

राष्ट्रिय चिकित्सक संघ नेपाल लुम्बिनी शाखाले प्रदेश पाँच सरकारको समाजिक विकास मन्त्रालयलाई मंगलबार चिकित्सा सामग्री हस्तान्तरण गर्दै चिकित्सक तथा स्वास्थ्यकर्मीको मनोबल बढाइदिन आग्रह पनि गरेको हो ।

कोभिड–१९ का विरुद्ध संघर्ष गरिरहेको प्रदेश ५ सरकारलाई विभिन्न राहत सामग्री पठाएको थियो । मन्त्री सुदर्शन बराललाई कान्सुका प्रतिनिधि डा. होङ हाङ, चिकित्सक संघका महासचिव सागर न्यौपाने, केन्द्रीय सदस्य सम्राट पराजुली, संघका शाखाका महासचिव सन्तोष पोखरलले उक्त सामग्री हस्तान्तरण गरेका थिए ।

२० हजार थान सर्जिकल माक्ससँगै थप सामग्री जुटाउने काम जारी रहेको डा. न्यौपानेले जानकारी दिए ।

कार्यक्रममा बोल्दै मन्त्री बरालले चीनकै भूमिलाई उद्गमस्थल बनाएर कोरोना भाइरस फैलिएपनि आफू पीडामा रहेको अवस्थामा समेत चीन सरकारले विश्व समुदायमा देखाएको उदारता र सहयोग उच्च मूल्यांकन गर्ने खालको भएको बताए ।

चीन सरकारले भाइरस नियन्त्रणमा प्राप्त गरेको सफलताका लागि बधाई दिँदै मन्त्री बरालले चिनियाँ सहयोग सधैं कायम रहने विश्वास व्यक्त गरे । डा. हङले आफ्नै देशबाट कोभिड–१९ को सुरुवात भएपनि चीन सरकार छिमेकी राष्ट्रहरूसँग सधैं संवेदशील रहेको बताए ।

राहतको संयोज गरेको नेकपा निकट नेपाल राष्ट्रिय चिकित्सक संघक महासचिव डाक्टर सागर न्यौपानेले कान्सु प्रान्त प्रदेश नम्बर पाँचसँग भागिनी सम्बन्ध राख्न चाहेको बताउँदै त्यहीअनुरुप प्रान्तबाट सहयोग आएको स्पष्ट पारे । राहतका अन्य सामग्रीहरू भन्सार छुटाउने प्रक्रियामा रहेकाले पछि हस्तान्तरण गरिने संघका केन्द्रीय सदस्य डाक्टर सम्राट पराजुलीले जानकारी दिए ।

स्वास्थ्यकर्मीकोपनि कोरोनापरीक्षण गर्न आग्रह

यसैबीच चिकित्सकहरूले स्वास्थ्य उपचारमा खटिएका सबै स्वास्थ्यकर्मीलाई मनोबल बढाउन र सँगसँगै स्वास्थ्य परीक्षणको व्यवस्था मिलाउन आग्रह गरेका छन् । स्वास्थ्य सामग्री हस्तान्तरण गर्न कार्यक्रममै चिकित्सक संघले फ्रन्टलाइनमा बसेर सेवा गर्ने स्वास्थ्य कर्मचारीहरूको यथाशिघ्र स्वास्थ्य परीक्षणको माग गरेका हुन् ।

उनीहरूले संघमार्फत समाजिक विकास मन्त्री बराललाई ज्ञापनपत्रसमेत बुझाएका छन् । भाइरसको संक्रमण नियन्त्रणका लागि विभिन्न क्वारेन्टाइन, आइसोशलन र अस्पतालहरूमा संक्रमित भएका, आशंका गरिएकाको परीक्षणका लागि खट्नुपर्ने सबै स्वास्थ्यकर्मीको स्वास्थ्य परीक्षणको व्यवस्था मिलाउन आग्रह गरेका हुन् ।

सो अवसरमा प्रदेशका माननीय तथा नेकपा प्रदेश स्वास्थ्य कमिटी संयोजक कृष्ण न्यौपाने, लुम्बिनी प्रादेशिक अस्पताल विकास समिति अध्यक्ष सूर्य भट्टराई, बुटवल उप–महानगरपालिकाका प्रतिनिधिलगायत सहभागी थिए ।