लामो समयदेखि नेपाल भारत सीमा बेलहिया (सुनौली) मा अलपत्र केही नेपालीको बुधबार साँझ उद्धार गरी नेपाल ल्याएको छ। 

भारतमा  क्वारेन्टाइन अवधि पूरा गरेका ५ सय १० नेपाली पहिलो चरणमा उद्धार गरी रुपन्देहीको तिलोत्तमा र सिद्धार्थनगर नगरपालिकाका क्वारेन्टाइनमा ल्याएर राखिएको छ। 

बुधबार १ हजार जनालाई ल्याउने भनिए पनि अन्य स्थानीय तहका क्वारेन्टाइन व्यवस्थित नभएको हुँदा ल्याउन नसकिएको तिलोत्तमाका मेयर बासुदेव घिमिरेले जानकारी दिए। उनीहरुलाई उद्धार गर्न तिलोत्तमाका मेयर घिमिरे, सिद्धार्थनगरका मेयर हरि अधिकारी गाडी लिएर पुगेका थिए। सीमामा अझै १ हजार भन्दा बढी नागरिक अलपत्र छन्।

उनीहरु पनि ल्याउने बारे छलफल चलिरहेको छ। नेपाल ल्याइएका मध्ये २ सय ३३ जनालाई तिलोत्तमा नगरपालिकाका २ वटा क्वारेन्टाईनमा राखिने छ भने बाँकी २ सय ७७ जनालाई सिद्धार्थ नगरपालिकाका २ वटा क्वारेन्टाइनमा राखिने छ।

भारतका बिभिन्न स्थानबाट नेपाल फर्केर भारतीय सिमावर्ती सुनौलीमा १ हजार २ सय बढी नेपाली रहेपनि क्वारेन्टाईनको व्यवस्थापन हुन नसक्दा अहिलेलाई ५ सय १० जना मात्र ल्याउन लागिएको हाे।

तिलोत्तमा नगरपालिकामा ल्याईएका २ सय ३३ जना मध्ये शंकरनगर सारदा उच्च माध्यमिक विद्यालयको क्वारेन्टाईनमा ३३ जना र मधवलिया स्थित मधवलिया माध्यमिक विद्यालयको क्वारेन्टाईनमा र २ सय जना राखिने छ।  

त्यसैगरी सिद्धार्थनगर नगरपालिकामा ल्याईएका २ सय ७७ जनालाई वडा ८ मा रहेको रुपन्देही लिलाराम माध्यमिक विद्यालय र वडा नं ५ मा रहेको भैरहवा माध्यमिक

विद्यालयको क्वारेन्टाईनमा राखिने छ। नेपाल ल्याइएका सबैको बिहीबार बिहानबाट स्वाव संकलन गरिने रुपन्देहीका प्रमुख जिल्ला अधिकारी महादेव पन्थले जानकारी दिए।