जेठ पाँच गते कर्णालीमा पहिलो कोरोना संक्रमण भेटियो । उक्त संक्रमण भारतबाट आएका दैलेखको आठबीस नगरपालिका वडा नं. एक का एक युवामा देखिएको थियो ।

कर्णालीमा कोरोना संक्रमण त्यसअघि देखिएको थिएन । चैत ११ गते भन्दा पहिले नेपालमा कोरोना संक्रमण देखिए तापनि कर्णालीमा कोरोना संक्रमण नदेखिनु कर्णाली सरकारले सफलताको रुपमा लिइरहेका समयमा एक्कासी भारतबाट आउने नागरिकहरुको संख्या एक्कासी बढ्यो । 

भारतबाट आएका नागरिकहरुको संख्या धेरै हुँदा पालिकाले निर्माण गरेका क्वारेन्टाईन अभाव भए । हुलका हुल नागरिकलाई विद्यालयको कोठामा राख्नुपर्ने बाध्यता आयो । दैलेखलगायतका जिल्लामा कोरोना संक्रमितहरु आन्दोलन नै गर्न बाध्य भए भने कतिपय स्थानबाट संक्रमित भागे । कतिपय स्थानमा क्वारेन्टीनमै बसेकाहरु आपसमा लडाई गर्न थाले । 

तर अहिले कर्णालीमा कोरोना संक्रमितको संख्या विस्तारै आरोलो लाग्दैछ भने कोरोना संक्रमित भएकाहरुमा ८० प्रतिशत भन्दा बढि नागरिक घर फर्किसकेका छन् ।

देशभरिमै सबैभन्दा बढि संक्रमित डिस्चार्ज हुनेमा कर्णाली पहिलो बनिरहेको छ । कर्णालीमा विहीबार दिउँसोसम्म जम्मा १५६१ जनामा कोरोना देखिएको छ भने ती मध्ये १३२१ जना घर फर्किसकेका छन् । सामाजिक विकास मन्त्रालयको स्वास्थ्य सेवा महाशाखाका प्रमुख डा. लक्ष्मीनारायण तिवारीका अनुसार असार २५ गतेसम्म कर्णालीमा मृत्यू भएका ६ जनामा कोरोना पुष्टि भएको छ । 

कर्णालीको कोरोना हबको जिल्लाको रुपमा दैलेख देखियो । ७८७ जना दैलेखमा कोरोना संक्रमित पुष्टि भयो भने दोस्रोमा सुर्खेत देखियो । सुर्खेतमा ४०२ जनामा कोरोना देखिदा सल्यानमा दुइ सय जनामा कोरोना देखिएको शाखाले जनाएको छ । कालिकोटमा ५०, रुकुममा १४, जुम्लामा ३२, मुगुमा पाँच, हुम्लामा २, जाजरकोटमा १७ जना र डोल्पामा तीन जनामा कोरोना पुष्टि भयो । अन्य प्रदेशका ४९ जनामा कोरोना संक्रमण पुष्टि हुँदा जम्मा १४०७ जना पुरुषमा तथा १५४ जना महिलामा कोरोना पुष्टि भयो । यसरी हेर्दा आजको मितिसम्म कर्णालीमा २३४ वटा मात्र एक्टिभ केसहरु रहेका छन् ।

कर्णालीमा चार वटा स्थानमा पिसिआर जडान भएको छ भने तीन वटा स्थानबाट कोरोना पुष्टि भएको प्रमाणित हुँदै आएको छ । जिल्ला अस्पताल दैलेख, प्रदेश अस्पताल कालागाउँ, कर्णाली स्वास्थ्य विज्ञान प्रतिष्ठान जुम्लाबाट नियमित रुपमा कोरोना परिक्षण भइरहेको छ भने रुकुम पश्चिमबाट पनि परिक्षण भइरहेको महाशाखाले जनायो ।

महाशाखा प्रमुख डा. तिवारीका अनुसार आगामी दिनमा भारतबाट नागरिक आउन रोकिएको खण्डमा कर्णाली कोरोनाको खतराबाट मुक्त भन्न सकिने बताए ।

‘अहिले १८ सय जना जति क्वारेन्टाईनमा बसिरहनु भएको छ । ती मध्ये धेरैको जाँच पनि भइसकेको छ । कोही १४ दिन पुग्दैछन् । १४ दिन पुगेकाहरुको स्वाव जाँच भइरहेको छ,’ उनले भने, ‘क्वारेन्टीन बेडहरु अधिकांश खाली भइसकेका छन् । आइसोलेसन सेन्टरपनि खाली भइरहेका छन् ।’