गण्डकी प्रदेशको राजधानी पोखरामा दिनानुदिन कोरोनाका संक्रमित बढ्न थालेपछि जिल्ला प्रशासन कार्यालय कास्कीले जारी निषेधाज्ञा कडाइ गरेको छ ।

अघिल्लो दिनको तुलनामा मंगलबार पोखराको बजार सुनसान छ । सडकमा पातलो संख्यामा मात्रै सवारीसाधन गडेको पाइन्छ । मानिसहरु पनि बाहिर खासै निस्केका छैनन् ।

प्रशासनले गत वैशाख १५ देखि एक साताका लागि निषेधाज्ञा आदेश जारी गरेकोमा कोरोनाको महामारी बढ्दै गएपछि कडाइसहित अवधि थपेको हो । वैशाख २१ देखि ३१ सम्म अत्यावश्यक कामबाहेक बाहिर निस्कन पाइने छैन भने छुट प्रदान गरिएका बाहेक निजी तथा सार्वजनिक यातायातका साधन चल्न रोक लगाइएको छ । 

दैनिक उपभोग्य वस्तुहरुका पसल बिहान ५ देखि ९ बजेसम्म मात्रै संचालन गर्न सकिने भएपछि दिउँसो ती पसल सबै बन्द छन् । बैंक तथा वित्तीय संस्थाहरु एक चौथाइ मात्र राखेर संचालन गरिएको छ । 

गाडीमा जोरबिजोर प्रणाली हटाइएको छ । मठ मन्दिरहरूमा नित्य पूजामात्र गर्न सकिने भए पनि अन्य कार्य गर्न पाइने छैन । बिहान ५ देखि ९ बजेसम्म डिपार्टमेन्ट स्टोर्सहरुको हकमा खाद्यान्न सामान बिक्री गर्न पाइनेछ ।

ढुंगा, गिट्टी, बालुवा, रड, सिमेन्ट जस्ता निर्माण सामग्री बोक्ने सवारीसाधन दिउँसो १ देखि साँझ ५ बजेसम्म संचालन गर्न सकिनेछ ।

कास्कीमा हाल सक्रिय संक्रमितको संख्या झन्डै १५ सय पुगेको छ । सोमबार साँझसम्म कास्कीमा १ हजार ३१५ सक्रिय संक्रमित रहेकोमा मंगलबार एकै दिन १ सय ४४ जना थपिएका हुन् । यो सहित गण्डकी प्रदेशभर मंगलबार १ सय ६१ संक्रमित थपिँदा कुल संक्रमित संख्या १९ हजार ५ सय ८५ पुगेको छ । 

पोखरामा मंगलबार थप १ जना कोरोना संक्रमितको मृत्यु भएको छ । मृत्यु हुनेमा म्याग्दीको मंगला गाउँपालिका ६ का ७६ वर्षीय पुरुष हुन् ।

गत वैशाख १७ मा कोरोना संक्रमण पुष्टि भएकोमा उनको मंगलबार मृत्यु भएको प्रदेश स्वास्थ्य निर्देशनालयले जनाएको छ । यो सहित गण्डकीमा कोरोनाबाट मृत्यु हुनेको संख्या २ सय ३३ पुगेको छ । २ दिनअघि गण्डकीमा एकै दिन ८ जनाको ज्यान गएको थियो ।