‘टुरिस्ट उम्मेदवार’को संज्ञा दिन थालिएपछि २०७४ सालको आमनिर्वाचनमै होमिएका बेला डा. आरजु राणा देउवाले धनगढीमा भव्य घर किनिन् ।

कैलाली निर्वाचन क्षेत्र नम्बर ५ बाट प्रतिनिधिसभा सदस्यका लागि चुनाव लडेकी प्रधानमन्त्री शेरबहादुर देउवापत्नी आरजुले घर किनेर आफू स्थानीय नै भएको देखाउन खोजिन् ।

धनगढीका व्यवसायी गोपाल हमालबाट राणाले ३ करोडमा घर किनिन्, भोट मागिन् तर उनी वाम गठबन्धनका उम्मेदवार नारदमुनि रानासँग पराजित भइन् ।

त्यो भव्य घर चुनावी प्रयोजनबाहेक प्रयोगमा आउन नसकेको बताइन्छ । कांग्रेस सभापति समेत रहेका शेरबहादुर देउवा हालै प्रधानमन्त्री भएपछि घरमा कडा सुरक्षा व्यवस्था गरिएको छ ।

जिल्ला प्रहरी कार्यालय कैलालीका प्रमुख तथा प्रहरी उपरीक्षक विश्व अधिकारीले भने, ‘विशिष्ट व्यक्तिको सम्पत्ति भएकाले सुरक्षा दिइएको हो । उहाँहरू चाहेको अवस्थामा आफ्नो घरमा बस्न सक्नुहुन्छ । बस्ने वा नबस्ने उहाँहरूको इच्छाको कुरा हो ।’ त्यो घरमा सुरक्षाका लागि २/२ जना जिल्ला प्रहरी कार्यालय कैलालीबाट नियमित खटिने गरेका अधिकारीले बताए ।

असोज ३१ देखि कात्तिक २ गतेको अविरल वर्षापछि भएको क्षति अवलोकन तथा निरीक्षणको क्रममा कात्तिक ४ र ५ गते प्रधानमन्त्री देउवा सुदूरपश्चिममा रहे तर सुरक्षा घेरामा रहेको त्यो घरमा नबसी होटल डिभोटी बसे ।

घर हुँदाहुँदै पनि घरमा नबसी होटल रोज्ने प्रधानमन्त्री देउवाको विलाशीशैलीमाथि टिप्पणी गर्दै नागरिक दैनिकमा कार्यरत पत्रकार पुष्पराज जोशी आफ्नो फेसबूक वालमा लेखेका थिए, ‘देउवा दाजु, हजुरको निवास (आरजु भाउजूको घर) पनि धनगढी उत्तर बेहडीमै हो । घर आएको मान्छे किन घरमा नबसेर होटलमा बस्नुभयो ? हामी जनताको प्रश्न हो । हजुर धनगढी आउँदा हामी उत्साहित छौं, किनकि प्रदेश राजधानी हजुरले घोषणा गर्नु भो, सरेको छैन तर यहाँ राजधानी भएपनि हामीले सडक जाम, जमिनको भाउ आकाशिनुका साथै कोठा भाडा महंगो, सबै कुरामा समस्या झेलेका छौं ... ।’

प्रधानमन्त्री देउवाको होटल बसाइलाई कसैले प्रधानमन्त्री विलासी भएको टिप्पणी गरेका छन् भने कसैले राज्यस्रोतको दोहन भएको भन्दै प्रधानमन्त्रीको आलोचना गरेका छन् ।

एक राति बसाइको क्रममा प्रधानमन्त्री, मन्त्री, सुरक्षाकर्मीको खर्च लाखौं भएको बताइएको छ । यद्यपि होटल डिभोटीले कुन निकायबाट खर्च व्यहोनेबारे यकिन नभएको र आफूहरूको व्यस्तताका कारण खर्चको बिल तयार गरी नसकेको बताएको छ ।

देउवा निवासमा रहेका प्रधानमन्त्री देउवाका भान्जा रमेश चन्दले भने, ‘अहिलेसम्म ३–४ पटक यहाँ आएर बसिसक्नुभएको छ तर प्रधानमन्त्री भइसकेपछि नेपाली सेनाले सुरक्षाको कारण देखाएपछि यहाँ नबस्नु भएको होला ।’

संघीय सरकारका अर्थमन्त्री जर्नादन शर्मा र पर्यटनमन्त्री प्रेमबहादुर आलेसहित आएका प्रधानमन्त्री देउवाले सुदूरपश्चिमका विभिन्न जिल्लास्थित पहिरो तथा बाढी प्रभावित क्षेत्रको निरीक्षण गरेका थिए ।

यसैबीच प्रधानमन्त्री देउवाको टोली धेरै क्षति भएका डोटी र बझाङका प्रभावित क्षेत्रमा नपुगेको र घण्टौं हिँडेर दुःख सुनाउन सदरमुकाम आएका पीडितलाई भेट पनि नदिएको भन्दै आलोचना भएको थियो ।

कञ्चनपुरको दोधारामा डेढ मिनेट सम्बोधन गरेका प्रधानमन्त्री देउवाले कार्यक्रमका सहभागीलाई हप्काउँदै ‘ए भाइ, बढ्ता बोल्दै हुनुहुन्छ, चुप लाग्नुस्’ भनेका थिए ।