रौतहटको देवाही गोनाही, नगरपालिकाका नगर प्रमुख धर्मेन्द्र प्रसाद पटेल अख्तियारको फन्दामा परेका छन् ।  उपभोक्ता समितिबाट भवन निर्माण सम्पन्न पश्चात अन्तिम बिल भुक्तानी दिने क्रममा बिभिन्न बहाना बनाई सेवाग्राहीसँग ५ लाख घूस मागेको भन्‍ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगबाट खटिएको टोलीले उनलाई २ लाख ५० हजार रुपैयाँ लिइसकेको अवस्थामा पक्राउ गरेको हो । 

उनीसहित निजका सहयोगी अशोक प्रसाद पटेल,  योजना शाखाका प्रमुख मुकेश पटेल  र सहलेखापाल प्रदिप कुमार यादवपनि पक्राउ परेका छन् । उनीहरुलाई घूस लिइसकेको अवस्थामा नगर प्रमुखकै कार्यकक्षबाट नियन्त्रणमा लिई थप अनुसन्धान भइरहेको  प्रवक्ता श्याम प्रसाद भण्डारीले जानकारी दिए ।