तनहुँको शुक्लागण्डकी नगरपालिका–१६ स्थित हिमाली प्रावि तनहुँको सार्वजनिक जग्गा बिक्रीवितरण गरेको आरोपमा विद्यालय व्यवस्थापन समितिका सदस्यसहित २० जनाविरुद्ध भ्रष्टाचार मुद्दा दर्ता भएको छ ।

अख्तियार दुरुपयोग अनुसन्धान आयोगले सोमवार विशेष अदालतमा विद्यालय व्यवस्थापन समितिका तत्कालीन सदस्य घनश्याम बानियाँ समेत २० जनाउपर गैरकानूनी लाभ तथा हानी पुर्‍याई भ्रष्टाचार गरेको भन्दै मुद्दा दर्ता गरेको हो ।

विद्यालय व्यवस्थापन समितिको बैठकले २०५१ वैशाख ११ गते निर्णय गरेर साविक ढोरफिर्दी गाविसमा रहेको सरकारी/सार्वजनिक जग्गालाई घरसारको कागजहरू बनाई आफैंले घडेरी नम्बर कायम गरेर गैरकानूनी रूपमा भोगचलन गर्ने गराएको तथा बिक्री वितरण गरेको कुरा अख्तियारले गरेको अनुसन्धानबाट खुलेको हो ।

बिक्री गरिएका घडेरीमा पक्की घर समेतका संरचना बनेको पाइएको छ ।

विद्यालय व्यवस्थापन समितिका तत्कालीन अध्यक्ष यामबहादुर बानियाँ, प्रधानाध्यापक तथा सदस्य सचिव यामबहादुर ठकुरी, सदस्यहरू घनश्याम बानियाँ, हरिकुमारी महत, धुनबहादुर पुलामी, ज्ञानबहादुर बानियाँ, खडकबहादुर बानियाँले १ लाख ६९ हजार ५१ रुपैयाँ लिएर सरकारी जग्गा भोग चलन गराउने कसूर गरेको अभियोगपत्रमा उल्लेख छ ।

प्रतिवादीहरूमध्ये घनश्याम बानियाँ, यमबहादुर ठकुरी र हरिकुमारी महतलाई १ लाख ६९ हजार ५१ रुपैयाँ बिगो कायम गरी सजाय हुन मागदाबी लिइएको आयोगको प्रवक्ता श्यामप्रसाद भण्डारीले जारी गरेको प्रेस विज्ञप्तिमा उल्लेख छ ।

प्रतिवादीहरूमध्ये यामबहादुर बानियाँ, धुनबहादुर पुलामी, ज्ञानबहादुर बानियाँ र खडकबहादुर बानियाँको मृत्यु भइसकेको कुरा अनुसन्धानबाट खुलेको भए पनि भ्रष्टाचारको कसूर गरेको देखिएकाले उनीहरूविरुद्ध पनि १ लाख ६९ हजार ५१ रुपैयाँ बिगो दाबी गरिएको छ ।

‘अपराधीसँगै अपराध पनि मर्दछ भन्ने फौजदारी न्यायको सर्वमान्य सिद्धान्त अनुसार निजहरूलाई कैद र जरिवानाको सजाय हुन नसक्ने तर भ्रष्टाचार निवारण ऐन २०५९ को दफा ४६ बमोजिम तथा मुलुकी फौजदारी कार्यविधि संहिता २०७४ को दफा ११३ र १५८ बमोजिम मरेको व्यक्तिको हकमा समेत सरकारी वा निजी बिगो, क्षतिपूर्ति वा रकम भराउन सकिने कानूनी व्यवस्था रहेकाले निजहरूले बिक्री गरेको जग्गाको रकम १ लाख ६९ हजार ५१ रुपैयाँ असूल गराउने प्रयोजनको लागि मात्र निजहरूलाई मृत्युपश्चात पनि प्रतिवादी कायम गरी मागदाबी लिइएको छ,’ प्रवक्ता भण्डारीले जारी गरेको विज्ञप्तिमा उल्लेख छ ।

प्रतिवादीहरू सनतबहादुर सिजाली मगर, तिलुदेवी बराल, डोलराज आचार्य, दिलबहादुर आले, विष्णु माया थापा, विष्णुप्रसाद लम्साल, शरणबहादुर विक, बलराम बानियाँ, बुद्धिमाया विक, बाबुराम बानियाँ, लोकबहादुर माकिम, पूर्णबहादुर विक, धनबहादुर विकले विद्यालय व्यवस्थापन समितिलाई १ लाख ६९ हजार ५१ रुपैयाँ दिएर सार्वजनिक जग्गालाई भोग चलन समेत गरेको हुँदा उनीहरूलाई पनि प्रतिवादी कायम गरिएको छ ।

जग्गाको प्रतिवादीहरूबाट भोग हटाई जफत समेत गरी पाउन भनी मागदाबी लिइएको छ ।

जग्गा भोग गर्ने प्रतिवादीहरूमध्ये लोकबहादुर माकिम, डोलराज आचार्य र धनबहादुर विकको पनि मृत्यु भइसकेको अनुसन्धानबाट खुले पनि उनीहरूलाई समेत प्रतिवादी कायम गरिएको छ । मरेको व्यक्तिको हकमा समेत सरकारी वा निजी बिगो, क्षतिपूर्ति वा रकम भराउन सकिने कानूनी व्यवस्था रहेकाले मरेका व्यक्तिविरुद्ध पनि मुद्दा चलाइएको छ ।