सप्तरी बलान बिहुल गाउँपालिकाकी उपप्रमुख रुवी गुप्तासहित ९ जनाविरुद्ध गलत प्रतिवेदन तयार गरेर भ्रष्टाचार गरेको भन्दै अख्तियार दुरुपयोग अनुसन्धान आयोगले मुद्दा दर्ता गरेको छ । 

गाउँपालिकाको ४ नम्बर वडा कार्यालयको अधुरो भवन निर्माणमा वास्तविक गरेको कामभन्दा बढी काम देखाएर भुक्तानी लिएको भन्दै उनीहरूविरुद्ध अख्तियारले आइतवार विशेष अदालत काठमाडौंमा आरोपपत्र दायर गरेको हो । 

उपप्रमुख गुप्ता, गाउँ कार्यपालिका सदस्य हरि प्रसाद मोची, तत्कालीन प्रमुख प्रशासकीय अधिकृत महेशकुमार यादव, तत्कालीन योजना शाखा प्रमुख रमेश मरीक यादव, तत्कालीन प्राविधिक शाखा प्रमुख सब-इन्जिनियर सन्तोषकुमार रजक,  तत्कालीन सह(लेखापाल सुभाष चन्द्र लाल, भवन निर्माण उपभोक्ता समितिका तत्कालीन अध्यक्ष सुशीलकुमार यादव, तत्कालीन कोषाध्यक्ष रम्भादेवी यादव, तत्कालीन सचिव शिवशंकर मण्डलविरुद्ध मुद्दा दायर गरिएको छ । 

अख्तियारले हिनामिना भएको १० लाख ५ हजार ४९७ रुपैयाँ बिगो कायम गर्दै मुद्दा दायर गरेको हो ।