सरकारी  स्वामित्वमा  रहेको  खाद्य  व्यवस्था  तथा    व्यापार कम्पनी लिमिटेडले डेढ लाख क्विन्टल चामल खरिद गरेको छ ।

लक्ष्यअनुसार धान खरिद गर्न नसकेपछि कम्पनीले विभिन्न जिल्लाबाट एक लाख ५७ हजार ५०० क्विन्टल चामल खरिद गरेको हो ।

प्रत्येक वर्ष कम्पनीले समर्थन मूल्यमा धान खरिद गरी चामल बिक्री गर्दै आएको थियो । यो वर्ष कम्पनीले ३० हजार मेट्रिक टन धान खरिद गर्ने लक्ष्य राखेको भए पनि त्यो नपाएपछि चामलै खरिद गरिएको कम्पनीका नायब महाप्रबन्धक श्रीमणिराज खनालले जानकारी दिए । उनले भने, “एक लाख ५७ हजार क्विन्टल चामल खरिद गरेका छौँ ।”

सरकारले यो वर्षका लागि मोटा धानको न्यूनतम समर्थन मूल्य प्रतिक्विन्टल दुई हजार ७५२ र मध्यम किसिमको धानको मूल्य दुई हजार ९०२ रुपैयाँ तोकेको थियो । गत वर्ष समर्थन मूल्यमा कम्पनीले ६० हजार मेट्रिक टन  धान खरिद गरेको थियो ।  

खोजेजति  मात्रामा  धान  नपाएपछि  कम्पनीले  एक  लाख ६२ हजार ५०० क्विन्टल चामल खरिद गर्न बोलपत्र आह्वान गरेको थियो । त्यसमा एक लाख ५७ हजार ५०० क्विन्टल खरिद गरिएको कम्पनीले जानकारी दिएको छ । कम्पनीले सोना मन्सुली, स्टिम जिरा मसिनो, अरुवा मोटा चामल, मध्य सिल्की कालामुनिया चामल खरिद गरेको जनाएको छ ।

कम्पनीले न्यूनतम प्रतिक्विन्टल तीन हजार ७५० देखि अधिकतम पाँच हजार ९९० रुपैयाँमा चामल खरिद गरेको जानकारी दिएको छ ।

कम्पनीले ठाउँअनुसार फरक–फरक मूल्यमा चामल खरिद गरेको छ । कम्पनीको शाखा कार्यालय विर्तामोड, प्रादेशिक कार्यालय  विराटनगर, लहान, वीरगञ्ज, भैरहवा, नेपालगञ्ज, धनगढी, सुर्खेत, दाङ  र प्रादेशिक कार्यालय काठमाडौँबाट चामल खरिद गरेको हो ।

कम्पनीले खरिद गरेको चामल सुपथ मूल्यमा बिक्री गर्दै आएको छ । कम्पनीले विभिन्न २४ दुर्गम जिल्लामा खाद्यान्न ढुवानी गर्दै आएको हो । सरकारले दुर्गम जिल्लामा खाद्यान्न ढुवानीमा अनुदान व्यवस्था गरेको छ । गोरखापत्र दैनिकमा खबर छ ।