यो साताको दोस्रो कारोबार दिन बुधबार पनि शेयर बजार ओरालो लागेको छ ।

पहिलो कारोबार दिन  सोमबार  ४९  अङ्कले  घटेको  शेयर  बजार  बुधबार झन्डै ३२ अङ्कले झरेको छ ।

बुधबार नेप्से परिसूचक ३१.६७ अङ्कले घटेर २२७५.६८ मा आइपुगेको छ । यो १.३८ प्रतिशतले कम हो । सेन्सेटिभ इन्डेक्समा भने १.११ प्रतिशतले गिरावट आएर ४३६.८८ कायम भएको छ । सोमबारको तुलनामा बुधबार कारोबार रकममा पनि गिरावट आएको छ ।

सोमबार एक अर्ब ४१ करोड तीन लाख पाँच हजार ३२२ रुपियाँको शेयर कारोबार भएकामा बुधबार एक अर्ब २६ करोड ९२ लाख १९ हजार ४२१ रुपियाँको मात्रै कारोबार भयो ।

सो दिन २३३ कम्पनीको ३६ लाख दुई हजार ८४८ शेयर कारोबार भयो । बुधबार  कारोबार  भएका  कम्पनीमध्ये  १५  वटाको शेयर मूल्य वृद्धि भयो भने १७७ वटाको घट्यो ।

सबै समूहको सूचक घटेकामा सबैभन्दा बढी जीवन बीमा समूह २८६.८२ र निर्जीवन बीमा समूह २१०.८२ अङ्कले घट्यो । यसैगरी विकास बैङ्क ८७.६३,  जलविद्युत्  ५९.९३,  लघुवित्त  ५३.५९,  उत्पादनमूलक समूह ४४.५७, व्यापार समूह ४३.०७, होटल र पर्यटन ४०.९८, वित्त ३४.१९, अन्य ३१.३९, बैङ्किङ १३.२३ र लगानी समूह १.०७ अङ्कले घटेको छ  । गोरखापत्र दैनिकमा खबर छ ।