२८ लाख रुपैयाँ घुस रकमसहित रंगेहात पक्राउ परेका सरकारी इन्जिनीयरबाट थप ९ लाख रुपैयाँ बरामद भएको छ ।

अख्तियार दुरुपयोग अनुसन्धान आयोगको टोलीले बुधबार बाग्मती प्रदेशको खानेपानी तथा सरसफाइ डिभिजन नं. ४, मन्थली रामेछापका इन्जिनीयर नवराज सत्याल र करारमा कार्यरत प्लम्बर बखतबहादुर थापालाई अख्तियारले १६ लाख रुपैयाँ नगद र १२ लाख रुपैयाँको चेकसहित नियन्त्रणमा लिएको थियो। छानबिन तथा अनुसन्धानको क्रममा थप ९ लाख रुपैयाँ बरामद गरिएको अख्तियार स्रोतको दाबी छ।

त्यस विषयमा अहिले अख्तियारले थप अनुसन्धान गरिरहेको छ। अख्तियारका प्रवक्ता साद भण्डारीका अनुसार खानेपानीसम्बन्धी कामको भुक्तानीबापत सेवाग्राहीसँग घुस माग गरिरहेको भन्ने सूचना एवं उजुरी निवेदनको आधारमा अख्तियार दुरुपयोग अनुसन्धान आयोग, टंगालबाट खटिएको टोलीले उनीहरूलाई पक्राउ गरेको हो।

सेवाग्राहीबाट १६ लाख रुपैयाँ नगद र १२ लाख रुपैयाँको चेक लिइसकेको अवस्थामा मन्थली- १ स्थित निवासबाटै पक्राउ गरिएको थियो। पछि थप ९ लाख भेटिएको हो ।