भारतमा केही दिनयता बागेश्वर धामका पीठाधीश्वर धीरेन्द्र कृष्ण शास्त्रीको चर्चा व्यापक रूपमा चलिरहेको छ । 

शास्त्रीले आफूलाई भेट्न आउने मानिसको मनमा के चलिरहेको छ पहिल्यै थाहा पाउने दाबी गरेका छन् । 

यसैबीच शास्त्रीले लंकाका राजा रावणसँग आफूले फोनमा कुरा गरेको बताएका छन् । उनले त्यो दाबी गरेको भिडियो अहिले चर्चित बनेको छ । 

रावणसँग बुन्देली भाषामा कुराकानी गरेको शास्त्रीको दाबी छ । सीतालाई किन हरण गरेको अनि रामसँग किन युद्ध गरेको भनी आफूले सोधेको उनले बताए । 

रावणको फोन नम्बर नसोध्न उनले मानिसहरूलाई भनेका छन् । 

यस विषयमा स्पष्टीकरण दिँदै शास्त्रीले रमाइलोका लागि यो कुरा भनेको बताए । कथा सुनाउँदा उदाहरण दिनुपर्ने हुन्छ र त्यसैक्रममा मानिसहरूलाई बुझाउनका लागि आफूले रावणसँगको फोनको उदाहरण दिएको उनको भनाइ छ । 

बागेश्वर धाम बाबाको विवाद चलिरहँदा एक पक्षले शास्त्रीको हिन्दू राज्य आकांक्षालाई समर्थन गरिरहेको छ । अर्को पक्षले चाहिँ शास्त्रीमाथि अन्धविश्वास फैलाइरहेको आरोप लगाएको छ ।