नेपाली कांग्रेसकी केन्द्रीय सदस्य तथा सांसद डा. आरजु राणा देउवाले स्वतन्त्र सासंद डा. अमरेश कुमार सिंहविरुद्ध गालीबेइज्जती तथा मानहानिको मुद्दा दर्ता गरेकी छन् ।

गत जेठ २६ गते देउवाले सिंहलाई विपक्षी बनाई जिल्ला अदालत काठमाडौंमा गालीबेइज्जती मुद्दा दर्ता गरेको आरजुनिकट स्रोतले लोकान्तरलाई जानकारी दियो  । स्रोतका अनुसार रिट निवेदनमा अमरेशलाई हदैसम्मको कारवाही गर्न माग गरेकी छिन् ।

जिल्ला अदालतमा दर्ता मुद्दाको सुनुवाइ पेशी असार २४ गते तोकिएको छ ।

पछिल्लो समय अमरेशले आरजुलाई ‘गणतन्त्रकी पम्फादेवी’को संज्ञा दिँदै आएका थिए । देशका ठूला भ्रष्टाचार काण्डमा आरजुको संलग्नता रहेको आरोपसहित अमरेशले सञ्चार माध्यममा अन्तवार्ता दिँदै हिँडेका थिए । 

सभापति शेरबहादुर देउवा र आरजुले आफूलाई टिकट नदिएको भन्दै अमरेश रुष्ट थिए । 

अमरेशविरुद्धको रिट निवेदनमा उनले सञ्चार माध्यममा दिएका अभिव्यक्तिलाई समेत समावेश गरिएको छ । रिटसँगै प्रमाणको रूपमा अडियो, भिडियोसमेत आरजुले पेश गरेकी  छन् । आरजुले दर्ता गरेको रिटलाई लामो समयसम्म गोप्य राख्न कोसिस गरिएको थियो । 

नक्कली शरणार्थी प्रकरणमा आफूमाथि नियोजित प्रहार गरिएको भन्दै आरजुले संसदमा आक्रोश व्यक्त गरेकी थिइन् । आफ्नो चरित्रहत्या गरिएको भन्दै कानूनी प्रक्रियामा जाने बताएकी थिइन् ।