रक्षा बन्धनको अवसर पारेर भदौको १४ गतेबाट सार्वजनिक प्रदर्शनमा आउन लागेको फिल्म ‘एैंचो पैंचो’मा समावेश पहिलो गीत सार्वजनिक गरिएको छ । 

बिहीवार राजधानीमा एक कार्यक्रमकाबीच आशिष अविरल र अस्मिता अधिकारीको स्वर रहेको ‘काले केटाले’ बोलको गीत सार्वजनिक गरिएको हो । एकनारायण भण्डारीको शब्द रहेको गीतमा आशिषकै संगीत एवं संगीत संयोजन छ । 

डान्सिङ विटको यो गीतमा एलेक्स विश्वकर्मा (पारस)को साथमा फिल्मका शीर्ष कलाकारहरू स्वस्तिमा खड्का, वर्षा राउत, मुकुन भुषाल, सुशील सिटौला र कोशिश क्षेत्री प्रस्तुत छन् । 

कविराज गहतराजको कोरियोग्राफीमा भिडियो तयार भएको हो । कृषा चौलागाईंको निर्देशन रहेको यो फिल्ममा राजाराम पौडेल, शारदा गिरी, बुद्धि तामाङ, विशाल पहारी, रमेश वुढाथोकी, रवीन्द्र झा, सुमन मोटे लगायतको पनि अभिनय छ । अभिमन्यू निरवीको कथा रहेको फिल्मलाई पुरुषोत्तम प्रधानले छायांकन एवं विपिन मल्ल र भूपेन्द्र अधिकारीले सम्पादन गरेका हुन् । 

प्रितम लामिछाने र आध्या लामिछाने निर्माता रहेको फिल्मको सह–निर्मातामा विशाल चौलागाईं रहेका छन् ।