आलोचना भएपछि प्रकाशले ‘जाले रुमाल फाट्यो’बाट हटाए भद्दा संवाद

गायक प्रकाश सपुतले ‘जाले रुमाल फाट्यो’को ‘इन्डिङ’मा समावेश भद्दा (अपाच्य) संवाद हटाएका छन् । गीत सकिएपछि प्रकाश र स्वस्तिमा खड्काले बोलेका दुई वटा संवाद भिडियोबाट हटाइएको हो । 

दुई वर्षअगाडिको सुपरहिट गीत ‘कुरा बुझ्न पर्च’को सिक्वेलका रुपमा गत शनिवार राती समीक्षा अधिकारीको स्वरमा ‘जाले रुमाल फाट्यो’ सार्वजनिक गरिएको थियो । 

भिडियोमा ‘कुरा बुझ्न पर्च’कै जोडी अभिनेत्रीद्वय स्वस्तिमा खड्का र आँचल शर्माका साथ गौरव पहारी, विशाल पहारीसँगै प्रकाश स्वयंमको अभिनय छ । 

गीत सार्वजनिक भएको छोटो समयमै युट्युब ट्रेन्डिङको शीर्षस्थानमा उक्लिन सफल रह्यो । विगतमा झैं प्रकाशको यस सिर्जनाले पनि लोभलाग्दो भ्युज पाउँदै गयो ।

गीतको पक्षलाई सबैले प्रशंसा गरे । तर, भिडियोको अन्तिममा समावेश संवादलाई लिएर भने धेरैले आलोचना गरे । 

गीतलाई चर्चामा ल्याउन प्रकाशले अनावश्यक रुपमा उक्त संवाद राखेको आरोप धेरैको थियो । 

आलोचनापछि प्रकाशले सोमवार साँझ भिडियोबाट उक्त संवाद हटाएका हुन् । उनले संवाद हटाउनुको कारणबारे आधिकारिक धारणा भने सार्वजनिक गरेका छैनन् । 

प्रकाशले यसअघि ‘पीर’ गीतमा ‘यौनकर्मी’को दृश्य विवादित बनेपछि भिडियो सम्पादन गरेर पुनः अपलोड गरेका थिए । 

‘जाले रुमाल फाट्यो’मा प्रकाशले जातीय विभेद विरुद्धको सन्देश दिन खोजेका छन् । हरेक प्रकारका विभेद अन्त्यका लागि कानुन प्रभावकारी हुनुपर्छ भन्ने सन्देश भिडियोमार्फत दिन खोजिएको छ । 

गीत युट्युब ट्रेन्डिङको शीर्षस्थानमा छ ।