अभिनेता अनमोल केसी यतिबेला चलचित्र ‘फर्की फर्की’को छायांकनमा व्यस्त छन् । यो चलचित्रको पोखरामा २७ दिन छायांकन सकेर निर्माण टिम काठमाडौं फर्किसकेको छ । 

चलचित्रको बाँकी छायाँकन काठमाडौंसहित अन्नपूर्ण बेस क्याम्प र इन्डोनेसियाको बालीमा हुने निर्माता रोहित अधिकारीले जानकारी दिएका छन् । 

आइतवार राती राजधानीको ठमेलस्थित एक क्लबमा चलचित्रको छायाँकन गरिएको छ । जहाँ अन्य दुई अभिनेताहरू सलोन बस्नेत र सलिनमान बानिया समेत देखिएका छन् । 

अनमोलका धेरै हिट चलचित्रमा सलोनले अभिनय गरेका छन् । ‘फर्की फर्की’मा पनि अनमोलसँगै सलोनलाई समेत दर्शकले देख्न पाउने भएका छन् । 

बुझिएअनुसार, यो चलचित्रमा सलोन केमियो भूमिकामा देखिन लागेका हुन् । उनको भूमिकालाई लिएर निर्माण पक्षले कुनै जानकारी दिएको छैन । अर्का, अभिनेता सलिनमान भने अनमोल र सलोन निकटका साथी भएका कारण छायांकन सेटमा पुगेका थिए ।

यो चलचित्रमा अनमोलको जोडीका रुपमा जसिता गुरुङले अभिनय गरेकी छन् । साथमा, रवी काफ्ले र समृद्धि अर्यालले समेत शीर्ष भूमिकामा अभिनय गरिरहेका छन् । 

सुयोग गुरुङको निर्देशनमा तयार भइरहेको चलचित्रमा रोहितसँगै ओम अग्रवाल निर्माताका रुपमा छन् । चलचित्रको सह निर्मातामा मनोज वली र रामु न्यौपाने छन् । आगामी वर्ष जेठ ११ गतेदेखि चलचित्र प्रदर्शनमा आउनेछ ।