मुलुकको आधुनिक इतिहासको सबैभन्दा घातक गोलीबारीको एक महिनापछि चेक संसद्ले शुक्रबार बन्दुक नियन्त्रण उपायहरू कडा बनाउने एक विधेयक पारित गरेको छ । यो कानून बन्ने दिशामा पहिलो कदम हो । 

डिसेम्बरमा राजधानीको ऐतिहासिक केन्द्र प्रागको चार्ल्स विश्वविद्यालयमा एक छात्रले आफैँलाई गोली हान्नुअघि १४ जनाको हत्या गरे र २५ जनालाई घाइते बनाएका थिए । 

उक्त विधेयक सरकारले गोलीबारीभन्दा केही महिना पहिला जुनमा प्रस्तुत गरेको थियो । उक्त विधेयकले बन्दुक बिक्रेताहरूलाई शङ्कास्पद खरिदको रिपोर्ट गर्न आदेश दिन्छ । 

सिनेटले पास गर्न र राष्ट्रपतिले कानूनमा हस्ताक्षर गर्न बाँकी रहेको उक्त विधेयकले अहिले पनि चेकहरूलाई बन्दुक खरिद गर्न, राख्न र बोक्न अनुमति दिनेछ । विधेयकले प्रहरीलाई सुरक्षा जोखिमका कारण हतियार जफत गर्न पनि अनुमति दिन्छ र बन्दुक मालिकहरूको कडा स्वास्थ्य परीक्षण गराउँछ । 

चेक मिडियाका अनुसार विश्वविद्यालयको हत्याअघि आफ्नो बुबा र दुई महिनाको बच्चासहित अन्य तीन जनाको गोली हानेर हत्या गर्ने विश्वविद्यालयका ती बन्दुकधारीसँग आठ हतियार थियो । चौबिस वर्षीय ती छात्रले अर्ध–स्वचालित राइफल, गोलाबारुद र साइलेन्सरसहित आफ्ना हतियार किन्नका लागि ऋण लिएका थिए । 

गृह मन्त्रालयले अहिले एउटा संशोधनको योजना बनाइरहेको छ । उक्त योजनाले बन्दुक स्वामित्वको नियमहरूलाई अझ कडा बनाउने छ । उक्त योजना यसै वर्ष संसद्मा प्रस्तुत गरिने छ ।