नेपाल टेलिकमका निलम्बित प्रबन्ध निर्देशक सुनिल पौडेल र सुरक्षित मुद्रण केन्द्रका निलम्बित कार्यकारी निर्देशक विकल पौडेललाई थप १० दिन थुनामा राख्न अदालतले अनुमति दिएको छ ।

गैरकानूनी सम्पत्ति आर्जन गरेको आरोपमा पक्राउ परेका उनीहरूलाई बुधवार विशेष अदालतले थप १० दिन थुनामा राखेर अनुसन्धान गर्न अनुमति दिएको हो ।

दुई पौडेल फरक–फरक भ्रष्टाचार मुद्दामा गत १० माघमा पक्राउ परेका थिए ।

अख्तियार दुरुपयोग अनुसन्धान आयोगले उनीहरूमाथि गैरकानूनी सम्पत्ति आर्जन गरेको तथा विदेशमा कमिसन लुकाएको लगायतका आरोपमा विशेषमा मुद्दा दायर गरेको हो ।

अख्तियारले गत असोज १५ गते सुनिल पौडेलसहितका व्यक्तिविरुद्ध २३ करोड २७ लाख ५८ हजार रुपैयाँ बिगो माग दाबी गर्दै विशेष अदालतमा मुद्दा दायर गरेको थियाे ।
 
त्यस्तै विकल पौडेलसहितका व्यक्तिविरुद्ध करिब ७० करोड रुपैयाँ मागदाबीसहित अख्तियारले गत वैशाखमा मुद्दा दायर गरेको थियो ।

यसअघि गत माघ १९ गते विशेषले पौडेलद्वयलाई हिरासतमै राखेर अनुसन्धान गर्न अनुमति दिएको थियो ।