बालुवाटारस्थित ललितानिवास जग्गा प्रकरणमा पूर्वभूमिसुधार मन्त्री चन्द्रदेव जोशीले सफाइ पाएका छन् । 

नीतिगत निर्णयमा आरोप दाबी नपुग्ने भन्दै विशेष अदालतले जोशीलाई बिहीवार सफाइ दिएको हो ।

यस्तै ललितानिवास जग्गा हिनामिना प्रकरणमा भाटभटेनी सुपर स्टोरका सञ्चालक मीनबहादुर गुरुङलाई २ वर्ष कैद सुनाइएको छ । न्यायाधीश खुसीप्रसाद थारूसहितको इजलासले बिहीवार गुरुङलाई २ वर्ष जेल र ८० लाख रुपैयाँ जरिवाना सुनाएको हो । 

यस प्रकरणमा प्रहरीको केन्द्रीय अनुसन्धान ब्युरोको अनुसन्धानका क्रममा गुरुङ लामो समय हिरासतमा बसेका थिए । विशेष अदालतले नेपाली कांग्रेसका नेता तथा पूर्वमन्त्री विजयकुमार गच्छदारलाई पनि सफाइ दिएको छ । 

अख्तियार दुरुपयोग अनुसन्धान आयोगले २०७६ माघ २२ गते तत्कालीन भौतिक योजनामन्त्री गच्छदार, तत्कालीन भौतिक पूर्वाधार सचिव दीपकुमार बन्स्यात, तत्कालीन भूमिसुधार मन्त्रीद्वय डम्बर श्रेष्ठ र चन्द्रदेव जोशी लगायतविरुद्ध भ्रष्टाचार मुद्दा दायर गरेको थियो ।