नेपाल उद्योग वाणिज्य महासंघका अध्यक्ष चन्द्रप्रसाद ढकालले साउदी अरबका लगानीकर्तालाई नेपालमा लगानी बढाउन आग्रह गरेका छन् ।

आज नेपाल उद्योग वाणिज्य महासंघ, लगानी बोर्ड नेपाल, साउदी अरबको लगानी मन्त्रालय, साउदी चेम्बर र नेपालस्थित साउदी अरब राजदूतावासले संयुक्त रूपमा आयोजना गरेको लगानी वेबिनारमा सम्बोधन गर्दै अध्यक्ष ढकालले यस्तो आग्रह गरेका हुन् ।

लगानी सम्मेलनको सन्दर्भ जोड्दै उनले नेपालमा लगानीकर्ताहरूलाई सहज वातावरण बनाउन नेपाल सरकारले निजी क्षेत्रसँग मिलेर काम गरिरहेका बताए । बाह्य लगानीकर्ताहरूलाई नेपालमा लगानी बढाउने उपयुक्त समय रहेको उनको भनाइ थियो ।

नेपालमा जलविद्युत्, पर्यटन, सूचना प्रविधि र व्यावसायिक कृषिमा थप लगानीका  सम्भावनाहरू सृजना भएको उनले बताए ।

लगानीकर्ताहरूका लागि थप अवसरहरू सृजना भएको तर्फ अध्यक्ष ढकालले साउदीका लगानीकर्ताहरूको ध्यानाकर्षण गराए ।

सरकारले आगामी १० वर्षमा २५ हजार मेगावाटभन्दा बढी जलविद्युत् उत्पादन गर्ने लक्ष्य राखेको छ ।​

जलविद्युत् उत्पादनको लक्ष्य हासिल गर्न वैदेशिक लगानी आवश्यक पर्ने भएकाले जलविद्युत्‌मा संयुक्त लगानी परियोजना विकास गर्न साझेदारी आवश्यक रहेको उनले बताए ।

उनले ​पर्यटन क्षेत्रमा प्राकृतिक सौन्दर्यले भरिपूर्ण नेपालको आफ्नै मौलिक विशेषताहरू भएकाले होटल रिसोर्ट तथा केबलकार परियोजनाहरूमा आफूले लगानी बढाएको बताए ।

अध्यक्ष ढकालले बाह्य लगानीकर्ताहरूका लागि पर्यटन बजार पनि आकर्षण रहेको बताए ।