सहकारी ठगीमा जोडिएका रवि लामिछानेलाई गृहमन्त्री बनाइएको विषयलाई नेपाली कांग्रेसले संसद्मा चर्काउने संकेत गरेको छ । 

बुधवार प्रतिनिधि सभा बैठकको शुरूमै आकस्मिक समय लिएर कांग्रेस सचेतक सुशीला थिङले सहकारी ठगीमा जोडिएका व्यक्तिलाई गृहमन्त्री बनाइएको भन्दै विरोध जनाएकी थिइन् । 

प्रधानमन्त्री पुष्पकमल दाहाल ‘प्रचण्ड’ले मागेको विश्वासको मतमाथिको छलफलका क्रममा कांग्रेस महामन्त्री विश्वप्रकाश शर्माले अभियोग लागेका व्यक्तिको सम्बन्धमा प्रश्न उठाउन नछाड्ने बताएका हुन् ।

कांग्रेस सचेतकको भनाइलाई लिएर नेकपा एमालेका अध्यक्ष केपी शर्मा ओलीले गरेको टिप्पणीप्रति समेत शर्माले असहमति जनाए । 

‘सहकारी ठगीमा जोडिएका, पोखरा महानगरपालिकाले प्रतिवेदन दिएर अनुसन्धानमा रहेकालाई प्रधानमन्त्रीले गृहमन्त्री बनाएर ल्याउनुभएछ, साँच्चिकै उहाँले उथलपुथल गरेर ल्याउनुभएछ,’ सचेतक थिङले भनेकी थिइन् । उनले स्वार्थ बाझिने मन्त्रालयमा ल्याइएको विषयमा प्रधानमन्त्रीले जवाफ नदिएसम्म सदन सहज ढंगले नचल्ने बताइन् ।  

संसद्मा बोल्ने क्रममा ओलीले बैठकको शुरूमा कांग्रेसले राखेको विषयमा कटाक्ष गरेका थिए ।

‘बिहानको परिस्थिति हेर्दा कांग्रेस दूधकुण्डमा नुहाएर आएकोजस्तो गर्‍यो, उसले ऐना हेरोस्,’ ओलीले भनेका थिए । 

बालकुमारी घटना सम्बन्धमा प्रकाश ज्वालाले राजीनामा दिनुपर्ने माग गर्दै प्रतिपक्षमा रहेको एमालेले संसद्मा प्रधानमन्त्रीको जवाफ माग गरेको थियो ।

राज्यका निकायले अनुसन्धान गरिरहेको व्यक्तिलाई मन्त्री बनाएको विषयमा फागुन २४ गतेको बैठकमा समेत विषय उठान गरेको थियो ।

सहकारी ठगीमा फरार रहेका जीबी राईसँग रविको साँठगाँठ र सहकारीको पैसा ग्यालेक्सी टीभीमा लगाएको पाइएको थियो ।