प्रधानमन्त्री पुष्पकमल दाहाल 'प्रचण्ड'ले आफूले सबै किसिमको जोखिम उठाएर समीकरण बदलेको बताएका छन् । 

प्रतिनिधि सभाको बैठकमा तेस्रोपटक विश्वासको मत लिँदा उठेका प्रश्नको जवाफ दिँदै प्रचण्डले जोखिम मोलेरै यो कदम उठाएको बताएका हुन् ।

‘विचार नगरी यो निर्णय गरिएको होइन । धेरै किसिमको जोखिम छ भन्ने थाहा पाएर लिएको कदम हो । ४८ घण्टामा फाल्ने हो भनेर लागेको पनि भोगेँ । यी सबैको लागि तयार भएरै यो कदम चालेको हो’, प्रचण्डले भने, ‘गर्दा गर्दै छोड्नुपर्यो भने इतिहासले मूल्यांकन गर्ला भनेर पहिले पनि जोखिम उठाएको हो । राष्ट्र, न्याय र समृद्धिको पक्षमा जति दिन मिल्छ काम गर्ने हो । नयाँ ढंगले नेपाली जनताले देख्ने गरी काम गर्छौ ।’ 

जतिपटक प्रधानमन्त्री भने यसको जग केपी ओली नै भएको उनले बताए । 

‘पहिले प्रधानमन्त्री केपीजीहरूले बनाएर प्रधानमन्त्री भएको हो । म त्यही प्रधानमन्त्री हो । जतिपटक विश्वासको मत लिए पनि’, प्रचण्डले भने, ‘पछि त्यो निषेध भए र कांग्रेससँग अगाडि बढें । त्यो पनि निषेध भएर उच्च तहको एकता भएको छ । यो अनुभवसहितको हो ।’