सुन तस्करी प्रकरणमा विध ल्याबका सञ्चालक भीमकान्त भण्डारी (बीके)लाई निगरानीमा राख्न सुन तस्करी सम्बन्धी जाँचबुझ गर्न गठित उच्चस्तरीय आयोगले सिफारिस गरेको छ ।

सुन तस्करी प्रकरणमा गत असोज १५ गते उच्च अदालतका पूर्वन्यायाधीश डिल्लीराज आचार्यको संयोजकत्वमा गठित उच्च स्तरीय आयोगले उक्त सिफारिस गरेको हो । आयोगमा सहकुल थापा, किशोरजंग कार्की र प्रेम राज जोशी सदस्य थिए ।

६० किलो सुन तस्करी प्रकरणमा पक्राउ परेका चिनियाँ मूलका बेल्जियन नागरिक दावा छिरिङसँग पटक–पटक कुराकानी भएको देखिएपछि भण्डारीलाई पनि निगरानीमा राख्नुपर्ने आयोग निष्कर्ष छ ।

दावासँग आर्थिक लेनदेन र चिनियाँ तस्करीहरूबारे कुराकानी गरेको तथ्य फेला परे पनि सीआईबीले गम्भीरतापूर्वक अनुसन्धान नगरेको भन्दै आयोगले निगरानीमा राख्न सिफारिस गरेको हो । उनीसँग आयोगले पनि बयान लिएको थियो ।​​

उनीविरुद्ध गैरकानूनी सम्पत्ति आर्जन मुद्दामा यस अघि अख्तियार दुरुपयोग अनुसन्धान आयोगले विशेष अदालतमा मुद्दा दायर गरेकोमा अदालतले सफाइ दिएको थियो ।

* [सच्याइएको: सुन तस्करी आयोगको प्रतिवेदनमा भण्डारीलाई राज्यको निगरानीमा राख्नुपर्ने हुनुपर्नेमा भूलबस मुद्दा चलाउन सिफारिश भन्ने वाक्य पर्न गइ सम्बन्धित व्यक्तिलाई परेको असरप्रति क्षमा माग्दै सच्याइएको छ ।]