स्पेनिस ला लिगा फूटबलको शीर्षस्थानमा रहेको रियल म्याड्रिडले सहज जीत हात पार्दै उपाधि यात्रालाई थप मजबुत बनाएको छ ।

साविक विजेता रियलले शनिवार राति घरेलु टोली ओसासुनामाथि ४–२ गोल अन्तरको सहज जीत निकाल्दै शीर्षस्थानमा १० अंकको अग्रता बनाउँदै उपाधि यात्रा थप मजबुत बनाएको हो ।

पाम्पलोनामा भएको खेलमा रियलको सहज जीतमा भिनिसियस जुनियरले दुई तथा ड्यानी कार्भाजल र ब्राहिम डियाजले समान एक–एक गोल गरे । भाल्भेर्डेले ३ असिस्ट प्रदान गरे । ओसासुनाका एन्टी बुडीमिर र इकर मुनोजले एक–एक गोल फर्काए ।

खेलको चौथो मिनेटमा नै भिनिसियसको गोलबाट रियलले अग्रता लिन सफल भएको थियो । तर, रियलको त्यो अग्रता लामो समय टिकेन ।

सातौं मिनेटमा एन्टीले गोल गर्दै खेललाई १–१ गोलको बराबरीमा ल्याए । 

खेलको १८औं मिनेटमा कप्तान कार्भाजलले गोल गर्दै रियललाई २–१ ले अघि बढाए । 

खेलको ६१औं मिनेटमा डियाजले गोल गर्दा रियललाई ३–१ को अग्रता दिलाए । 

६४औं मिनेटमा भिनिसियसले व्यक्तिगत दोस्रो तथा टोलीका लागि चौथो गोल गर्दै रियललाई सहज जीततर्फ अघि बढाए । 

यद्यपि इन्ज्युरी समयको थप गरिएको पहिलो मिनेटमा मुनोजले गोल गर्दै खेललाई ४–२ को स्थितिमा ल्याए ।

यस जीतले रियलले शीर्षस्थानमा १० अंकको अग्रता बनाएको छ । रियलको २९ खेलबाट ७२ अंक पुगेको छ । समान खेलबाट जिरोनाको ६२ अंक छ । एक खेल कम खेलेको बार्सिलोनाको ६१ अंक छ । पराजित ओसासुना ३६ अंक जोडेर ११औं स्थानमा छ ।