लुम्बिनी क्षेत्रको पर्यटन प्रवर्द्धन तथा विकासका लागि गैरआवासीय नेपाली संघ (एनआरएनए) र बुद्व परिपथका ४ नगरपालिकाबीच समझदारी पत्रमा हस्ताक्षर भएको छ ।

काठमाडौंमा बुधवार आयोजित कार्यक्रममा एनआरएनएका अध्यक्ष डा बद्री केसी, एनआरएनएका पर्यटन प्रबद्र्धन समितिका संयोजक सोम सापकोटा, लुम्बिनी सांस्कृतिक नगरपालिकाका मेयर सजरुद्धिन मुसलमान, कपिलवस्तु नगरपालिकाका प्रमुख (मेयर) सुदीप पौडेल,  देवदह नगरपालिकाका मेयर ध्रुव खरेल र रामग्राम नगरपालिकाका मेयर धनपत यादवले समझदारी पत्रमा हस्ताक्षर गरेका हुन् ।

समझदारी पत्रमा एनआरएनएले लुम्बिनी र बुद्ध परिपथको विकासका लागि नगरपालिकाहरूसँग एक भएर अघि बढ्ने, गैरआवसीय नेपाली भएका देशमा त्यहाँका नागरिकलाई लुम्बिनी भ्रमणको लागि उत्प्रेरित गर्ने उल्लेख छ ।

त्यस्तै बुद्ध धर्मका बारेमा विभिन्न देशमा प्रचारप्रसार गर्ने, बुद्ध दर्शनबारे अन्तर्राष्ट्रिय सम्मेलनहरू आयोजना गर्ने, बुद्ध दर्शनसम्बन्धी संघसंस्था तथा कूटनीतिक नियोगसँग पनि समन्वय गरेर लुम्बिनीलाई संसारसँग जोड्न पुलको रुपमा एनआरएनएले काम गर्ने उल्लेख छ ।

कार्यक्रममा एनआरएनएका अध्यक्ष डा बद्री केसीले पर्यटकको वातावरण तयार गर्न र नेपालको संस्कृति तथा सम्पदा विश्वमा चिनाउन आफूहरूले बुद्ध परिपथका नगरपालिकाहरूसँग सहकार्य गरेको बताए । 

‘हामी ७० लाख नेपाली बाहिर छौं । त्यतिले एक–एक जना मानिस भित्र्याउन सकेपनि असंख्य पर्यटक भित्र्याउन सक्छौं भन्ने अवधारणा हो,’ उनले भने,  ‘लुम्बिनीमा गएर आधा घण्टामा फर्किने चलन छ । बुद्ध परिपथका चार पालिकामा पर्याप्त सम्पदाहरू छन् । तिनीहरूको इतिहास बुझाउन सक्ने हो भने पर्यटकहरू एक हप्ता लुम्बिनी बस्छन् ।’ बुद्ध र  शान्तिको सन्देशसँगै आफूहरूले नेपालको सम्पदा र संस्कृतिको प्रचारप्रसार गर्ने केसीको भनाइ छ ।

कार्यक्रममा लुम्बिनी सांस्कृतिक नगरपालिकाका मेयर सजरुद्धिन  मुसलमानले एनआरएनएसँगको समझदारीले लुम्बिनीको अन्तर्राष्ट्रिय प्रचार प्रसारमा ठूलो सघाउ पुग्ने बताए ।

कपिलवस्तु नगरपालिकाका मेयर सुदीप पौडेलले स्थानीय तहबाट बुद्धस्थलको विकासका लागि सक्दो प्रयास गरेको र त्यसमा एनआएनएले काँध थापेको उल्लेख गरे । समझदारी पत्रमा नभई आफ्नो सपना र विश्वासमा हस्ताक्षर गरेको अनुभव भएको उनले सुनाए ।

रामग्राम नगरपालिकाका मेयर धनपत यादवले विदेशमा बसेका नेपालीले लुम्बिनीसँगै अन्य बुद्धस्थलहरूकोे पर्यटनमा चासो राखेको भन्दै खुशी लागेको बताए ।

देवदह नगरपालिकाका मेयर ध्रुव खरेलले स्थानीय नगरपालिकालाई पनि एकैठाउँमा राखेर सञ्चालन गरिने यो कार्यक्रमले पर्यटन क्षेत्रमा ठूलो फाइदा पुग्ने उल्लेख गरे ।

कार्यक्रममा कोशी प्रदेशसभाकी सांसद मिना श्रेष्ठले बुद्धको प्रचारमा यसअघि धेरै कुरा छुटेको भन्दै समझदारी पत्रमा हस्ताक्षर कार्यक्रमले छुटेका कुरा पूरा हुँदै जाने बताइन् । उनले कोशीमा पनि यस्ता कार्यक्रम ल्याउन एनआएनएसँग आग्रह गरिन् ।

एनआरएनका उपमहाचिव तथा पर्यटन प्रवद्र्धन समितिका संयोजक सोम सापकाेटाले बुद्ध परिपथको संस्थागत रुपमा विकासका लागि आफूहरूले स्रोत प्रयोग गर्ने उदेश्यले नगरपालिकाहरूसँगको सहकार्यमा अभियान अगाडि बढाएको बताए । हस्ताक्षरपछि अब आफूहरूले पर्यटन प्रबर्द्धनमा व्यवस्थित रुपमा काम गर्ने उल्लेख गरे ।

कार्यक्रममा संस्कृति, पर्यटन तथा नागरिक उड्यन मन्त्रालयका उपसचिव सरोजकुमार पोखरेल, नेपाल पर्यटन बोर्डका वरिष्ठ अधिकृत लक्ष्मण गौतम, एनआएनएका कार्यालयका सीईओ राजेन्द्रकुमार राउत लगायतले एनआरएनएले पर्यटन क्षेत्रमा नौलो कार्यको शुरूवात गरेको बताएका थिए ।