प्रमुख प्रतिपक्षी दल नेपाली कांग्रेसले सहकारी ठगीमा गृहमन्त्री रवि लामिछानेको संलग्नताबारे संसदीय छानबिन समितिको माग दोहोर्‍याएको छ । 

सहकारी ठगीको छानबिन नसकिँदासम्म गृहमन्त्रीले नैतिकताका आधारमा पद छाड्नुपर्ने कांग्रेसको भनाइ छ ।

सोमवार बसेको प्रतिनिधि सभा बैठकको शुरूमै सभामुखसँग समय लिएर कांग्रेस सांसद प्रतिमा गौतमले सहकारी ठगीमा मुछिएका गृहमन्त्रीमाथि संसदीय छानबिन गर्नुपर्ने प्रतिपक्षको मागलाई बेवास्ता गर्दा आशंका झन बढेको बताएकी हुन् । 

‘सत्तासाझेदार दलका नेताहरू एउटा व्यक्तिलाई जोगाउन लागिपर्नुभएको छ । सरकारका मुखिया र गठबन्धनका नेताहरू ‘आई एम द स्टेट’ जसो गरी एउटा ठगबारे आफू अनुकूलमा फैसला सुनाउनु हुन्छ । सरकार सहकारी ठगको पक्षका वकालत गरिरहेको छ,’ गौतमले भनिन्, ‘प्रधानमन्त्रीले प्रमाण पुगेन भन्नुहुन्छ । आरोपित गृहमन्त्री उजुरीलाई चिर्कटोको संकेत दिनुहुन्छ । उजुरी कागजमा लेख्ने होला नि, कि ताम्रपत्र या स्वर्णपत्रमा लेख्नुपर्ने हो ? संसदीय छानबिनमा सत्तापक्षको आनाकानीले आशंका बढाएको छ । ‘दालमे कुछ काला हे’ भन्ने हिन्दी कहावत सम्झाएको छ ।’

संसददेखि सडकसम्म सहकारी ठगीको विषय आइरहेको समयमा कांग्रेसले यो विषयलाई यत्तिकै सेलाउन नदिने उनले बताइन् । ‘आफ्नो गाँस कटाएर र इच्छा आकांक्षालाई दबाएर सहकारीमा जम्मा गरेको सर्वसाधारणको पैसा केही ठगले अपचलन गरेका छन् । यसबारे हामी बोलेनौं भने हाम्रो उपादेयदा के ?’ उनले प्रश्न गरिन् । 

सकारी ठगीमा रविको संलग्नताबारे कांग्रेसले चैत ६ देखि लगातार संसदीय छानबिनको माग गर्दै आएको छ ।