जनकपुरमा छुरा प्रहार गरी एक युवकको हत्या गरेको आरोपमा २ जना पक्राउ परेका छन् ।​​

पक्राउ पर्नेमा जनकपुरधामको शान्तिनगर बस्ने रोशन दास र अर्जुन साह छन् ।

घटनामा संलग्न रहेको आरोपमा उनीहरूलाई अनुसन्धानका लागि पक्राउ गरिएको धनुषाका प्रहरी प्रवक्ता रञ्जन अवाले बताए ।

प्रहरीका अनुसार जनकपुरधाम उपमहानगरपालिका–४ स्थित विश्वकर्मा चोकमा आज २० वर्षीय प्रिन्स महासेठको सोमवार दिउँसो छुरा प्रहार गरी हत्या भएको थियो ।

जिल्ला प्रहरी कार्यालयका प्रहरी नायब उपरीक्षक अवाका अनुसार विश्वकर्मा चोकमा तीन/चार जनाको एक समूहबीच झगडा हुँदा महोत्तरीको एकडारा गाउँपालिका–३ भटौलिया निवासी घर भएका प्रिन्समाथि छुरा प्रहार भएको थियो ।​

प्रिन्सलाई उपचारका लागि लैजाँदै गर्दा मृत्यु भएको प्रवक्ता अवाले बताए ।

स्थानीयका अनुसार छुरा प्रहारबाट गम्भीर घाइते प्रिन्स त्यहाँबाट भाग्दै गर्दा बाटोमा लडी बेहोस भएका थिए ।

सोही अवस्थामा स्थानीय र प्रहरीले प्रिन्सलाई उद्धार गरी प्रादेशिक अस्पताल जनकपुरधाम लैजाँदै गर्दा बाटोमै मृत्यु भएको हो । 

मृतक युवकको शव पोस्टमार्टमका लागि प्रादेशिक अस्पताल जनकपुरमा राखिएको र घटनाका विषयमा थप अनुसन्धान गरिरहेको जिल्ला प्रहरी कार्यालयले जनाएको छ ।