एसीसी प्रिमियर कप टी-२० प्रतियोगिताको पहिलो सेमिफाइनल खेलमा नेपालले यूएईविरुद्ध कमजोर प्रदर्शन गरेका छ । ओमानको मस्कटमा रहेको अल अमरेत क्रिकेट मैदानमा टस हारेर पहिला ब्याटिङको निम्तो पाएको नेपालले यूएईविरुद्ध खराब ब्याटिङ गरेको हो । 

यूएईका बलसामु नेपाली ब्याटरहरू चल्न सकेका छैनन् । १६ ओभरको खेल सकिँदा नेपालका सन्दीप जोराबाहेक ६ ब्याटरले दोहोरो अंकमा रन बनाउन सकेनन् । ४० बल खेलेका सन्दीप ५० रन बनाएर आउट भए । 

१६ ओभर सकिँदा नेपाल ६ विकेट गुमाएर ८९ रन बनाएको छ । अहिले क्रिजमा गुल्सन झा र करण केसी छन् । 

त्यसअघि दीपेन्द्रसिंह ऐरी आठ बलमा पाँच रन, कप्तान रोहित पौडेल  १८ बलमा ५ रन बनाएर आउट भए । आशिफ शेख ८, कुशल मल्ल ३ र सोमपाल कामी २ रन बनाएर आउट भए । 

यूएईका तीव्र गतिका बलर जुनैद सिद्दिकको पहिलो ओभरको पहिलो बलमै कुशल भुर्तेल एज लागेर विकेटकिपर हैदरबाट समातिन पुगेका थिए ।

नेपाली टोली जारी प्रिमियर कपमा अपराजित टोली हो । नेपालले समूह चरणका चार खेलमा चार जीत निकालेको थियो । यूएई भने समूह चरणमा ओमानसँग हारेको थियो । 

आजै हुने दोस्रो सेमिफाइनलमा समूह बी को विजेता ओमानले समूह ए को उपविजेता हङकङसँग खेल्नेछ। सो खेल सवा ४ बजे शुरू हुनेछ । 

प्रिमियर कपको विजेताले टी २० एसिया कपमा स्थान बनाउनेछ । एसिया कपमा पुग्ने टोलीले भारत र पाकिस्तानसँग खेल्ने मौका पाउनेछन् ।