नेकपा (एमाले)का अध्यक्ष केपी शर्मा ओलीले अचानक सत्ताबाट बाहिरिएको नेपाली कांग्रेसले राष्ट्रिय स्वतन्त्र पार्टी (रास्वपा) र अन्य दलका नेतालाई प्रधानमन्त्री प्रस्ताव गर्दै समीकरण बदल्न खोजेको आरोप लगाएका छन् । 

गोदावरीमा शनिवार भएको राष्ट्रिय महाधिवेशन प्रतिनिधि परिषद् बैठकमा राजनीतिक प्रस्ताव पेश गर्दै पूर्वप्रधानमन्त्री ओलीले नयाँ समीकरण बन्नासाथ कांग्रेस हतास र आक्रोशित हुँदै यस्तो गतिविधिमा लागेको आरोप लगाएका हुन् ।

‘अचानक सत्ताबाट बाहिरिनु पर्दा यतिबेला कांग्रेस आक्रोशित, क्षुब्ध र हतास देखिन्छ । यही हतासले उसलाई प्रतिशोधको राजनीतिमा पुर्याएको छ । फागुन २१ गतेबाट शुरू भएको नयाँ समीकरणलाई सफल हुन नदिन र भत्काउन उसले हरसम्भव प्रयास गर्यो । त्यसका लागि उसले रास्वपा र अन्य कतिपय दलका नेताहरूलाई प्रधानमन्त्री पदको समेत प्रस्ताव गरेको पाइयो,’ ओलीले प्रस्तुत गरेको राजनीतिक प्रस्तावमा उल्लेख छ, ‘तर कांग्रेसको प्रस्ताव अस्वीकार गर्दै ती दलहरू नयाँ राजनीतिक समीकरणमा संलग्न हुनासाथ उ यतिबेला हतास मनस्थितिका साथ विरोध र सदनमा अवरोध गरिरहेको छ । यसका पछाडि प्रतिशोधबाहेक कुनै तर्कसङ्गत आधार छैनन् ।’

सत्ताबाट हट्नुपरेपछि सहकारी प्रकरणमा कांग्रेस व्यक्ति विशेषमाथि खनिएको आरोप पनि ओलीले लगाए । 

‘निश्चित व्यक्तिलाई निशाना बनाएर राजनीतिक प्रतिशोधको भावनाले अगाडि सारिएका र पुष्टि नभएका विषयमा प्रवेश गर्न सकिँदैन,’ प्रतिवेदनमा उल्लेख छ, ‘हिजोसम्म सरकारमा रहँदा अख्तियारले बयानमा बोलाएका, अदालतले पुर्पक्षका लागि थुनामा राखेका र गम्भीर अनियमिततामा संग्लग्न भएका मन्त्री र नेताहरूलाई राजीनामा गराउन तयार नहुने कांग्रेसले यतिबेला अरुमाथि प्रश्न उठाउने नैतिक आधारसमेत राख्दैन ।’

यद्यपि, सहकारीका गम्भीर समस्या समाधानमा एमाले स्पष्ट रहेको प्रतिवेदनमा भनिएको छ । 

‘सहकारी क्षेत्रमा गम्भीर समस्या देखा परेका छन्, वचतकर्ताको अबौँ रकम हिनामिना भएको छ,’ प्रतिवेदनमा भनिएको छ,, ‘यसको गम्भीर छानबिन गरी दोषीहरूलाई कानूनी कारबाही गरिनु पर्छ । यस विषयमा पार्टी स्पष्ट छ ।’ 

ओलीको टिप्पणी– विचार नभएको रास्वपा विकल्प होइन, एकीकृत समाजवादी जनताबाट अस्वीकृत भयो