वैशाख १५ गते शनिवार हुन गइरहेको उपनिर्वाचनअन्तर्गत इलाम–२ का १९ मतदानस्थल अति संवेदनशील रहेको प्रहरीले निष्कर्ष निकालेको छ । कुल ७९ मतदानस्थलमध्ये ३९ वटा सामान्य रहेको प्रहरीले जनाएको छ । 

प्रहरीले बिहीवार पत्रकार सम्मेलन आयोजन गरी उपचुनावको सुरक्षाका लागि १ हजार ३६३ प्रहरी परिचालन गर्न लागिएको जानकारी गराएको हो । प्रहरीले ३९ मतदानस्थललाई सामान्य, २१ लाई संवेदनशील र  १९ वटालाई अतिसंवेदनशीलमा सूचीकृत गरेको छ । 

सामान्य मतदानस्थलमा ८ देखि १३ जना, संवेदनशीलमा ९ देखि १४ जना र अतिसंवेदनशीलमा १२ देखि १७ प्रहरी परिचालन गर्न लागिएको प्रहरी प्रवक्ता भीम ढकालले जानकारी दिए । 

प्रहरीले निर्वाचनविरोधी दल र समूहका गतिविधि, जातीय, धार्मिक र साम्प्रदायिक गतिविधि, बुथ कब्जालगायत सुरक्षा खतरा रहेको जनाएको छ । 
यस्तै अफवाह फैलाउने र प्रहरीलाई ‘मिस गाइड’ गर्ने जस्ता सम्भावित खतरा रहेको प्रहरीले औंल्याएको छ । 

प्रतिनिधिसभा र र सुदूरपश्चिम प्रदेशसभामा रिक्त एक–एक सीटका लागि शनिवार मतदान हुँदैछ । प्रहरीले बझाङका २२ मतदानस्थललाई पनि अतिसंवेदनशील रहेको निष्कर्ष निकालेको छ ।