काठमाडौं, ४ माघ- सरकारले ७ नम्बर प्रदेशको अस्थायी मुकाम धनगढी तोकेपछि सबैभन्दा तनाव डोटीका कांग्रेस नेता/कार्यकर्तालाई भएको छ । आफ्नो जिल्लामा प्रदेश राजधानी नतोकिएकोमा दु:ख त सबैलाई छ, तर कांग्रेसहरुलाई दु:ख मानेर तथा आन्दोलन गरेर मात्र सुख छैन, सत्तारुढ दल हुनुको नाताले जनतालाई जवाफ पनि दिनुपरेको छ ।

आफ्नै सरकारले आफूहरुले भनेको नसुनेपछि बुधाबर प्रदेश राजधानी तोकिएको केही घण्टा नबित्दै उप-सभापतिसहित जिल्ला कमिटीले नै राजीनामा घोषणा गर्‍यो। यसरी राजीनामा दिनेहरुको सूचीमा सभापति प्रदीप देउवाको नाम थिएन। तर, उनी पारिवारिक कामको शिलशिलामा काठमाडौंमा रहेकाले छुटेका रहेछन् ।

उनले आफू परिवारको सदस्य बिरामी परेकाले उपचारका लागि राजधानीमा रहेको जानकारी दिए ।

दीपायललाई प्रदेश राजधानी नबनाइएकोमा देउवाले दु:ख व्यक्त गरे । 'सभापति (शेरबहादुर देउवा)ज्यूलाई ४/५ पटक भेट्यौँ, हुन्छ-हुन्छ भन्नु'भो तर, भएन,' लोकान्तरसँग उनले दु:खेसो पोखे।

पार्टीबाट राजीनामा दिने जिल्ला नेताहरुप्रति नै उनको सहानुभूति देखियो। 'कांग्रेसकै सरकार भएको बेलामा, आफ्नै प्रधानमन्त्री भएको बेलामा यस्तो भयो, अनि के गर्नु?' जिल्ला कमिटीले नै राजीनामा दिएको प्रसंगमा उनले भने।

जिल्ला गएर साथीहरुको राजीनामा फिर्ता गराउने कि आफू पनि मिसिने त? 'फिर्ता गर्ने त कुरै हुँदैन, साथीहरुले मासको बीचमा घोषणा गरिसक्नु'भो, अब आन्दोलन नै गर्ने हो,' उनले भने।

देउवाले गृहजिल्ला फर्किनुअघि एकपटक शीर्ष नेतालाई भेट्ने सोचेका छन्, यद्यपि राजधानी तोकिएपछि अहिलेसम्म कुरा भएको छैन।

उनले सबै हिसाबले प्रदेश राजधानीका लागि दीपायल उपर्युक्त रहेको बताए । 'उच्च अदालत, क्षेत्रीय प्रशासन कार्यालय सबै दीपायलमै छ, ऐतिहासिक ठाउँ पनि हो, अब जे हुन्छ, आन्दोलनबाटै हुन्छ,' उनले भने ।

हेर्नुहोस् कांग्रेसका जिल्ला नेताहरुले दिएको राजीनामा-

जिल्ला सभापति देउवाले फेसबुकमार्फत नै जिल्ला कमिटीले दिएको राजीनामाप्रति ऐकेबद्धता जनाएका छन् ।

यस्तो छ उनको अभिव्यक्ति- 

'प्रदेश नं. ७ को अस्थायी राजधानी डोटी हुनुपर्छ भनी हामीले गरेका प्रयत्नहरूलाई बेवास्था गर्दै जुन सरकारले अस्थायी मुकाम तोकेको छ, त्यसले डोटीको इतिहास पहिचान मेटाउने काम गरेको छ र डोटेली जनताका लागि खेदजनक छ । किमार्थ स्वीकार गरिन्न । साथै उक्त निर्णयलाई तत्काल सच्याउन जोडदार माग गर्दछु र जिल्लाबासी तथा पार्टीका साथीहरूले चालेका आन्दोलका हर कदमरूमा मेरो दृढ समर्थन छ । साथीहरू लडाईँ शुरु भएको छ, त्यसलाई गन्तव्यमा पुर्‍याउनु छ, संयमका साथ अगाडि बढ्न पनि अनुरोध गर्दछु ।'

सरकारी निर्णयको विरोधमा डोटीमा आन्दोलन चर्किँदै गएको छ । बिहीबार प्रधानमन्त्री शेरबहादुर देउवाको 'शवयात्रा'सहित उग्र प्रदर्शनसमेत भएको थियो । आन्दोलन अझै जारी छ ।