काठमाडौं, २ जेठ– पहिला–पहिला बिरामीले डाक्टरहरूलाई भगवानको रूपमा लिन्थे । अस्पताल पुगेका बिरामीहरू औषधि उपचारले मात्र होइन चिकित्सकको सेवा र व्यवहारले पनि छिट्टै निको भएको आभाष गर्थे । तर अहिले अवस्था बदलिएको छ । कहिले चिकित्सकको लापरवाहीले बिरामीको मृत्यु भएको खबर त कहिले बिरामीकै आफन्तबाट डाक्टर कुटिएका समाचारहरू आइरहन्छन् । डाक्टरलाई भगवान ठान्ने बिरामी र बिरामीलाई निको बनाउन पाउनु आफ्नो सौभाग्य सम्झने चिकित्सकहरू बीचको सम्बन्धमा यस्तो परिवर्तन कसरी आयो ?

नेपालमा बिरामी र चिकित्सकबीच विश्वासको वातावरणमा कमी आउनुको कारण अस्पतालको व्यवस्थापकीय कमजोरी भएको डा. प्रकाश बञ्जाडे बताउँछन् । युनाइटेड नेसन्स युथ एण्ड स्टुडेन्ट एसोसियसन नेपालको अध्यक्ष रहेर युवा डाक्टरहरूको नेतृत्व गर्दै आएका बञ्जाडेको निष्कर्ष अस्पतालहरूको व्यवस्थापकीय कमजोरीका कारण बिरामीले गुणस्तरीय सेवा पाउन नसकेको भन्ने छ ।

‘नेपालमा जुनियर र सिनियर भनेर डाक्टरहरू विभाजित छन्, भर्खरै स्वास्थ्य सेवाको क्षेत्रमा प्रवेश गरेका डाक्टर र दक्ष भइसकेका डाक्टरहरू बीच नै भेदभाव र समन्वयको अभाव छ,’ लोकान्तर डटकमको कार्यक्रम लोकान्तर हेल्थ शोमा कुराकानी गर्दै डा. बञ्जाडेले भने, ‘यसको असर बिरामीहरूमा परिरहेको छ । बिरामीको अनुपातमा चिकित्सको संख्या निर्धारण नहुँदा बिरामीले राम्रोसँग उपचार सेवा पाउन सकेका छैनन् । जसका कारण बिरामीहरूले डाक्टरलाई हेर्ने दृष्टिकोण फरक भएको छ ।’

चिकित्सा क्षेत्रमा भर्खरै प्रवेश गरेका चिकित्सकहरूले ३६ देखि ७२ घण्टासम्म निरन्तर खटिनुपर्ने आवस्था रहेको भन्दै उनले नयाँ र पुराना चिकित्सक बीचको विभेद अन्त्य हुनुपर्ने धारणा राखे ।

हेरौँ डा. बञ्जाडेसँग गरिएको भिडियो कुराकानी :