सपना, विचारा मेरो सपना !

कहिले उडान भर्छ निलो गगनभन्दा माथि । 
अनि कहिले पछारिन्छ भक्कानिँदै समातेर छाती ।।

कहिले पुग्न खोज्छ गन्तव्यको नजिक नजिक । 
अनि कहिले देख्छ कल्पना र वास्तविकताबीच दूरी अधिक ।। 

कहिले नाँच्छ खुशी र उत्साहले छमछमी । 
अनि कहिले रुन्छ परिस्थिति र बाध्यताले कनीकनी ।।

सपना, विचारा मेरो सपना !

म निराश हुँदा सहानुभूति दर्शाउँछ शीर थप्थपाएर । 
उठाउन खोज्छ गिरेको मेरो आत्मविश्वास हौसलाको गीत गुनगुनाएर ।।  

कहिले दिक्क मान्दै छोड्न खोज्छ साथ ।
शायद माया लाग्दो हो पुनः समाउन आइपुग्छ मेरै हात ।। 

सपना, विचारा मेरो सपना !

छाड्दैन मलाई कहीँ, कहिल्यै, कतै एक्लै ।
ठान्दैन आफूलाई मबाट अलग र बेग्लै ।।

कहिले मुर्छित बन्छ असफलतारुपी गोलीहरूबाट । 
अनि कहिले बेइज्यती सहन्छ मान्छेका हतोत्साहित बोलीहरूबाट ।। 

सपना, विचारा मेरो सपना !