समाजवादी पार्टीका संघीय परिषद् अध्यक्ष एवं पूर्व प्रधानमन्त्री डा. बाबुराम भट्टराईले राजनीतिक नेता, ठेकेदार र कर्मचारीतन्त्रबीचको लगनगाँठो जब्बर बनिसकेको टिप्पणी गरेका छन् ।

गोरखाको दरौंदीमा नदीजन्य पदार्थको मनपरी दोहन तथा त्यही निर्माणाधीन सडकको बेहाल रहेको प्रसंग उद्धृत गर्दै बाबुरामले सोही क्षेत्रको जनप्रतिनिधि समेत रहेको आफूले केही गर्न सकेको टिप्पणी गरेका छन् ।

बाबुरामले नदी दोहनको तस्वीर समेत राख्दै ती तस्वीरमा देखिने बालुवा/गिट्टीको पहाड सत्तारुढ नेकपा र प्रतिपक्षी दल नेपाली कांग्रेसनिकट ठेकेदारको भएको उल्लेख गरेका छन् ।

हेर्नुहोस्, यस्तो छ बाबुरामको स्टाटस :

गोरखाको दरौँदी फाँटमा एकातिर नदीजन्य पदार्थको मनपरी दोहनको यस्तो भद्दा रूप प्रस्ट देखिन्छ भने अर्कोतिर १२ वर्षदेखि निर्माणाधीन १२ किलोबाट दरौंदी किनार हुँदै बारपाकसम्म पुग्ने सडकको बेहाल हेरिनसक्नु छ !

राजनीतिक नेता-ठेकेदार-कर्मचारीतन्त्रको लगनगाँठो यति जब्बर छ कि त्यस क्षेत्रको प्रतिनिधिसभा सदस्य रहेको र भूपू प्रम भैटोपलेको म बबुरोको महिनौंदेखिको चिच्याहट अरण्यरोदन बनिरहेको छ !

(स्मरण रहोस्, पहिलो फोटोमा देखिने बालुवा/गिट्टीको पहाड प्रमुख प्रतिपक्षी पार्टीनिकट ठेकेदारको हो भने दोस्रो फोटोमा देखिने बालुवा/गिट्टिको पहाड सत्ताधारी पार्टी निकट ठेकेदारको हो !)

अब के गर्नुपर्ला ? स्थानीय सरोकारवाला जनसमुदाय र सबै नागरिकहरूको सुझावको अपेक्षा गर्दछु !