काठमाडौं, २४ मंसिर — संसारसमक्ष धार्मिक कट्टरताका लागि चिनिने साउदी अरब अब सफ्ट इस्लामतर्फ बढिरहेको छ । 

विगत एक वर्षमा यहाँ महिलाहरूलाई गाडी चलाउने अधिकार दिइएको छ । अनि त्यहाँ फिल्म र संगीतका समारोह पनि आयोजन गरिए । 

साउदीका युवराज मुहम्मद बिन सलमानले यी परिवर्तनहरू ल्याएका हुन् । उनका बारेमा महिलाहरूले ट्वीट गरेका छन् । अब आफूहरू पनि २१औं शताब्दीसँग जोडिन सकिने भनी उनीहरूले सन्तोष व्यक्त गरेका छन् । 

बत्तीस वर्षीय युवराज सलमानले अक्टोबरमा आयोजित एक कार्यक्रममा भनेका थिए, ‘विगत ३० वर्षमा साउदीमा जे भयो, त्यो हाम्रो वास्तविकता हैन । हामी पहिला जे थियौं अहिले त्यही बन्न चाहन्छौं । यहाँ नरम इस्लाम थियो र यो सबै धर्म र संसारकै लागि खुला थियो ।’

सलमान सत्तामा शक्तिशाली भएयता साउदीमा धेरै परिवर्तनहरू आएका छन् । 

मुसलमानी कानूनहरूको पालना गराउने धार्मिक प्रहरी मुतावाको अधिकार कम गरिएको छ । यिनीहरूले महिलालाई पञ्जा लगाउँदा समेत पक्राउ गर्थे । 

यसै वर्षको सेप्टेम्बर महिनामा महिलालाई गाडी चलाउने अधिकार प्राप्त भएको थियो । उनीहरू जुन २०१८ देखि गाडी चलाउन सक्छन् । 

फेब्रुअरीमा जेद्दाहमा साउदीमा पहिलो कमिक कन फेस्टिभल भयो । यो समारोहमा मानिसलाई साउदीमा नभई कुनै पश्चिमा देशमा भएको अनुभव भयो । 

साउदीमा सरकारी सेवा लिनका लागि महिलाहरूले पिता, पति, भाइ वा छोराको अनुमति लिनुपर्थ्यो र उनीहरूलाई अभिभावक भएको बताउनुपर्थ्यो । यो नियमलाई अन्त्य गरिएको छ । 

साउदीमा फिल्म फेस्टिभल पनि भयो । त्यहाँको सबभन्दा ठूलो मल अपरेटर अरेबियन सेन्ट्रलले १० नयाँ मलमा फिल्म हल बनाउने भएका छन् । अर्को वर्ष फिल्म देखाउन सकिनेछन् । 

सलमानले मदीनामा एउटा विशेष भवन बनाउने भएका छन् । त्यहाँ इस्लामका विद्वानहरूले बहस गर्नेछन् । इस्लामका नाममा कट्टरपन्थीहरूले के गलत कुरा थोपरेका छन् भनी बहस हुनेछ । 

साउदी अरबमा पप गीतहरूको कन्सर्ट पनि यसै वर्ष भयो । हालै राजधानी रियादमा कमेडी फेस्टिभल आयोजना गरियो । फेब्रुअरीमा जेद्दाहमा सार्वजनिक कन्सर्ट पनि आयोजना गरियो । 

सेप्टेम्बरमा साउदीको ८७ औं स्थापना दिवसको दिन पहिलोपटक महिलाहरूलाई रंगशाला जाने अनुमति दिइयो । 

साउदीमा मनोरञ्जनका नयाँ परियोजनामा २.७ अर्ब डलर खर्च भइरहेको छ । सन् २०१९ मा शुरु हुने गरी मनोरञ्जन भवन यहाँ बन्नेछ । 

सरकारले रिसोर्ट बनाएर त्यसभित्र महिलाहरूलाई स्कर्ट बिकिनी लगाएर घुम्ने अनुमति दिने सम्भावना छ ।

एजेन्सी