कञ्चनपुर, २९ मंसिर– प्रतिनिधिसभा निर्वाचनअन्तर्गत समानुपातिकतर्फको मतगणना चलिरहँदा नेकपा माओवादी केन्द्र समग्रमा तेस्रो दल बनेको छ ।

समानुपातिकको मतगणनामा नेकपा एमालेले अग्रता हासिल गरिरहँदा नेपाली कांग्रेस १ लाखभन्दा कम मतले पछाडि छ । तर नेकपा माओवादी केन्द्र भने समानुपातिकतर्फ निकै पछाडि छ । 

देशभरका प्राय सबै निर्वाचन क्षेत्रको समानुपातिक मतपरिणाममा तेस्रो स्थानमा सीमित रहन पुगेको माओवादी केन्द्र कञ्चनपुरको निर्वाचन क्षेत्र नम्बर १ मा भने पहिलो पार्टी बनेको छ । 

कञ्चनपुर–१ बाट प्रत्यक्षतर्फ माओवादीकी बिना मगर ठूलो मतान्तरसहित विजयी भएकी छन् । कांग्रेसका उम्मेदवारलाई ठूलो मतान्तरले पराजित गरेकी बिनाको प्रभाव समानुपातिकतर्फ पनि परेको देखिन्छ । 

कञ्चनपुरमा समानुपातिकतर्फ ६३ हजार ४ सय १६ मत खसेको थियो । जसमा माओवादी केन्द्रले १९ हजार १३ मत ल्याएर पहिलो बनेको छ । 

कञ्चनपुर १ मा प्रत्यक्षतर्फ ठूलो मतान्तरले पराजित भएको कांग्रेस समानुपातिकतर्फ भने दोस्रो दल बनेको छ । उसले १७ हजार ७ सय ५३ मत प्राप्त गरेको छ । तस्रो स्थानमा रहेको एमालेले १६ हजार ७ सय ५३ मत प्राप्त गरेको छ । 

कञ्चनपुर–१ मा प्रदेशसभातर्फ पनि माओवादी नै पहिलो पार्टी बनेको छ । माओवादीले १७ हजार १७ मत ल्याउँदा नेकपा एमालेले १५हजार ८ सय ३१ मत ल्यायो भने नेपाली कांग्रेसले १५ हजार २ सय ४९ मत प्राप्त गर्यो ।