काठमाडौँ, ८ फागुन- एमाले र माओवादी केन्द्रबीच पार्टी एकता गर्ने नीतिगत सहमति भएको छ । संगठनात्मक विषय भने थप छलफल गरेर टुंगो लगाइनेछ ।

एकीकृत पार्टीको ‘नाम नेपाल कम्युनिस्ट पार्टी’ रहने र एकता महाधिवेशनसम्म अन्तरिम राजनीतिक प्रतिवेदन एवं अन्तरिम विधान तयार पारेर एकीकृत पार्टी सञ्चालन गर्ने दुई दलको सहमति छ ।

साढे चार महिनादेखिको छलफलमा ‘ब्रेक थ्रु’ गर्दै दुई दलले सोमबार राति पार्टी एकताको सातबुँदे प्रारम्भिक आधारपत्रमा हस्ताक्षर गरेका हुन्, नयाँ पत्रिकामा खबर  छ ।

सहमतीबारे एमाले नेता ईश्वर पोखरेल भन्छन् :
हामीबीच ऐतिहासिक सहमति भएको छ, दुई अध्यक्षबीच हुँदै आएको छलफलले सहमतिसँगै मूर्तरूप पाएको छ । अब एकतालाई पूर्णता दिन वैचारिक–सैद्धान्तिक र संगठनात्मक विषयलाई आवश्यक विधिका आधारमा टुंग्याइनेछ । हामीले गरेको सहमति जस्ताको तस्तै राखेका छौँ, बाँकी विषय केही पनि छैन ।

माओवादी नेता जनार्दन शर्मा भन्छन् :  

दुई अध्यक्षबीच भएका छलफलका आधारमा एकता संयोजन समितिको बैठक नेतृत्व, नीति र सरकारका विषयमा एउटा निष्कर्षमा पुगेको छ । त्यसैका आधारमा हस्ताक्षर भएको छ । एकीकरणलाई मूर्त बनाउन संगठनात्मक विषय मिलाउन र अन्तरिम विधान तयार पार्न कार्यदल बन्दै छन् । यी गृहकार्यका लागि भोलि (मंगलबार)देखि नै काम गर्न सुरु हुन्छ । त्यसैले अहिले पार्टी एकताको घोषणाका लागि सहमतिपत्रमा हस्ताक्षर भएको छ ।

बालुवाटारमा भएको बैठकमा सरकारमा कुन कुन मन्त्रालय लिने भन्ने विषयमा छलफल भएन । अब दुई पार्टी एक हुने भएपछि सल्लाह गरेर सरकारमा मन्त्री पठाउँछौँ । सम्भवतः एक साताभित्र माओवादीतर्फबाट मन्त्रीहरू सरकारमा जान्छन् । अहिलेसम्म हेर्दा रामबहादुर थापा बादलको नेतृत्वमा सरकारमा जाने तयारी छ । तर, कुन–कुन नेतालाई मन्त्री बनाउने भन्ने विषयमा छिट्टै टुंगो लगाउँछौँ ।