काठमाडौं, २९ जेठ – अमेरिकाका राष्ट्रपति डोनल्ड ट्रम्पले उत्तर कोरियाको क्षेप्यास्त्र इन्जिन परीक्षणस्थलको विनाशका बारेमा थप विवरण दिइने बताएका छन् ।

उत्तर कोरियाका नेता किम जोङ–उनसँगको ऐतिहासिक शिखर सम्मेलनपछि पत्रकारहरूसँग कुरा गर्दै अघिल्लो हप्ता उत्तर कोरियाविरुद्ध आफूले ३०० वटा शक्तिशाली प्रतिबन्ध तयार पारेको तर त्यसलाई लागू नगरेको बताए । सम्मेलनको ठीकअघि ती प्रतिबन्ध लगाउनु असम्मानजनक हुने उनले बताए । 

उत्तर कोरियाले आणविक परीक्षणस्थललाई ध्वस्त पारेर आणविक निःशस्त्रीकरणप्रतिको प्रतिबद्धता देखाइसकेको ट्रम्पले दाबी गरे ।

किमसँगको सम्मेलनमा धेरै कुरा हासिल गरेको पनि उनले बताए । 

आणविक कार्यक्रमको पूर्ण, विश्वसनीय र अपरिवर्तनीय निःशस्त्रीकरणको प्रतिबद्धता उत्तर कोरियाले किन नगरेको भन्ने प्रश्नमा ट्रम्पले त्यसका लागि समय नभएको बताए ।  ‘म यहाँ जम्मा एक दिनका लागि छु । यो प्रक्रिया अब अघि बढ्नेछ, उनले भने । 

आणविक निःशस्त्रीकरण प्रक्रियामा चीनको भूमिकालाई ट्रम्पले खासै महत्त्व दिएनन् । ‘हामीहरू दक्षिण कोरिया र जापानसँग काम गरिरहेका छौं । चीनसँग पनि काम गरिरहेका छौं तर अलि कम मात्रामा,’ उनले भने । 

ट्रम्पले यसअघि किमसँग डील हुन्छ कि हुँदैन भेटेको केही सेकेन्डमै थाहा पाउने भनी घमण्ड गरेका थिए । उक्त टिप्पणीका बारेमा प्रश्न गर्दा ट्रम्पले भने, ‘पहिलो केही सेकेन्डमै थाहा हुन्छ । हो, कहिलेकाहीँ त्यसले काम गर्दैन तर कहिलेकाहीँ त गर्छ ।’

‘कसैले डील गर्न चाहन्छ भने म थाहा पाइहाल्छु । यसरी थाहा पाउनु मेरो प्रतिभा हो । उनी डील गर्न चाहन्छन् जस्तो लाग्छ । वार्ताहरू चलिरहेकाले गर्दा हामीले यसको परिणाम छिट्टै थाहा पाउँछौं,’ ट्रम्पले थपे । 

यो शिखर सम्मेलनका सबभन्दा ठूला विजेताहरू उत्तर कोरियाको गुसगमा बस्ने एक लाख मानिस भएको पनि उनले बताए ।

किमसँगको सम्मेलन ‘इमान्दार, सीधा र सिर्जनात्मक’ भएको ट्रम्पले दाबी गरे । 

आफूहरूले ‘युद्ध अभ्यासहरू’ बन्द गर्ने पनि उनको भनाइ थियो । 

किमलाई आफ्नो बराबरी हैसियतको ठान्नुहुन्छ भन्ने प्रश्नमा उनले भने, ‘म त्यसरी हेर्दिनँ । संसारलाई थप सुरक्षित बनाउनका लागि जे गर्नुपर्ने हो म गर्छु ।’

किमसँगको सम्मेलन विश्व इतिहासको अत्यन्त महत्त्वपूर्ण घटना भएको ट्रम्पले बताए । पत्रकार सम्मेलन अन्त्य गर्दै उनले भने, ‘तर यो प्रक्रिया टुंगियोस् भन्ने म चाहन्छु किनकि हामीले गोललाइनको पर्तिर बल पु–याएनौं भने यसको
खासै अर्थ हुँदैन ।’

ट्रम्पले आफूलाई आराम चाहिएको तर छिट्टै काममा फर्किने बताए ।

उनले थपे, ‘म अध्यक्ष किमसँग एउटै मञ्चमा बसिरहेको छु अनि त्यसो गर्दा तीन करोड मानिसको जीवन सुरक्षित हुन्छ भने म मञ्चमा सँगै बस्न चाहन्छु । म खुशीका साथ फेरि सिंगापुर आउन चाहन्छु ।’

द गार्डियनबाट