काठमाडौं, १० असार – अमेरिकाको ह्वाइट हाउसकी प्रेस सचिव सारा स्यान्डर्सलाई ट्रम्प प्रशासनको नीतिको कारण देखाउँदै भर्जिनियास्थित एक रेस्टुराँ मालिकले कुनै सेवा नदिने भन्दै बाहिर जान लगाएका छन् । 

शुक्रवार एक फेसबूक प्रयोगकर्ताले आफूलाई भर्जिनियाको द रेड हेन रेस्टुराँको वेटरका रूपमा परिचय दिँदै साराह स्यान्डर्सलाई जम्मा दुई मिनेटको सेवापछि सँगै आएका सबैसहित बाहिर जान लगाएको लेखे । 

स्यान्डर्सले शनिवार ट्वीट गर्दै यो घटनाको पुष्टि गरिन् । उनले लेखिन्, ‘हिजो राति मलाई लेक्सिङटनको रेड हेन रेस्टुराँले म ट्रम्प प्रशासनमा काम गर्ने हुनाले निकालिदियो । म विनम्रतापूर्वक त्यहाँबाट निस्कें ।’

रेस्टुराँकी मालिक स्टेफनी विल्किन्सनले भनिन्, ‘साराको काम मेरो व्यवहारभन्दा बढी नराम्रो छ । म मानिसहरूसँग सधैं राम्रो व्यवहार गर्छु । म जससँग सहमत छैन, त्यससँग पनि आदरका साथ व्यवहार गर्छु ।’

तर राष्ट्रपतिका क्रूर नीतिहरूको बचाउ गर्नेलाई चाहिँ आफूले कहिल्यै स्वीकार नगर्ने स्टेफनीले द वाशिङटन पोस्टलाई बताइन् । उनले आफ्ना अधिकांश कर्मचारीहरू समलैंगिक रहेका र साराले तेस्रोलिंगीलाई सशस्त्र बल प्रयोग गरेर
भिन्नै राख्ने ट्रम्पको नीतिलाई बचाउ गरेकाले आफू क्रुद्ध भएको बताइन् । 

रेस्टुराँका केही मानकहरू रहेका र तिनको पालन गर्नेपर्ने उनको भनाइ छ । इमान्दारी, दया र सहयोग ती मानक हुन् । 

अमेरिकामा यसअघि आन्तरिक सुरक्षा मन्त्री क्रिस्टजेन नीलसनले पनि एक रेस्टुराँमा प्रदर्शनकारीहरूको सामना गर्नुपरेको थियो ।

एजेन्सी