काठमाडौं, ११ असार – सहमति भएको ५ महिनासम्म पनि कार्यान्वयन नहुँदा नर्सहरू आन्दोलित भएका छन् ।

सरकारले गत माघमा नेपाल नर्सिङ संघसँग ११ बुँदे सहमति गरेको थियो । सहमति कार्यान्वयनका लागि नर्सिङ संघले पहल नगरेको आरोप लगाउँदै नर्सहरूले संघविरुद्ध नै आन्दोलन शुरू गरेका छन् । सहमतिको पहिलो नम्बरमा मानव अंग प्रत्यारोपण केन्द्रबाट हटाइएका नर्स त्रजिता जति, सजना द्यौलालाई ७५ प्रतिशत तलब  उपलव्ध गराउने र थप ३ महिनाको लागि करार थप्ने व्यवस्था मिलाउन मन्त्रालयले निर्देशन दिने सहमति भएको थियो ।

सहमति अनुसार भोलिपल्ट मानव अंग प्रत्यारोपण केन्द्रमा नर्स त्रजिता र सजनालाई अस्पतालमा पुनः नियुक्त गरिएपनि ७५ प्रतिशत तलब नपाएको उनीहरूले गुनासो गरेका छन् । ‘हामीलाई १ महिनाभित्र नै ७५ प्रतिशत तलब दिने भनिएको थियो, सहमति भएको ५ महिनासम्म पनि हामीले तलब पाएनौं,’ नर्स त्रजिताले लोकान्तरसँग भनिन्, ‘सरकारसँग सहमति भए अनुसार तलब पाएनौं भनेर नर्सिङ संघमा पटक–पटक धाइसक्यौं । तर, हाम्रो कुरा नर्सिङ संघले समेत सुनेन ।’

‘नर्सिङ संघ र सरकारसँग भएको सम्झौता अनुसार हामीले तलब पाएका छैनौं, हामीलाई न्याय दिलाउन सक्दैन भनेर लिखित रुपमै भनिदिए हामी बरु चुप लागेर बस्छौं, यत्तिकै झुलाएर राख्नु भएन नि !’ सजनाले थपिन् । स्वास्थ्य मन्त्रालयमा आफ्ना मागको विषयमा कुरा राख्न जाँदा उनीहरूलाई ‘नर्सिङ संघले कुनै पहल गरेको छैन’ भनेर पठाउने गरिएको उनीहरूको गुनासो छ ।

देशभरका नर्सको हकहितको लागि कार्य गर्नुपर्ने नर्सिङ संघ अधिकारभन्दा पनि आफ्नै राजनीतिक स्वार्थमा मात्रै लागेको उनीहरूको आरोप छ । नर्स त्रजिनाले आक्रोशित हुँदै भनिन्, ‘नेपाल नर्सिङ संघ नर्सिङ पेशाको पेशागत हितभन्दा पनि राजनीतिमा बढी लागेको छ, त्यसैले देशभरका नर्सको हितको लागि सरकारसँग भएको ११ बुँदे सहमति पूरा नभएको हो ।’

सरकारसँग गरेको ११ बुँदे सहमति कार्यान्वयन नहुनुमा नेपाल नर्सिङ संघको कमजोरी रहेको नर्सहरूको आरोप छ । युवा नर्स सञ्जालको नेतृत्वमा नर्स त्रजिता, सजना सहितको नर्सको समूहले गत शुक्रबारदेखि नेपाल नर्सिङ संघको कार्यालयमा ताला लगाएको छ । उनीहरूले नर्सको ११ बुँदे सहमतिको विषयमा नर्सिङ संघका पदाधिकारीले छलफल गरेर सहमति कार्यान्वयनको पहल नगरेसम्म ताला नखोल्ने अडान राखेका छन् ।

नेपाल नर्सिङ संघकी अध्यक्ष तारा पोख्रेलले आफूहरूले ११ बुँदे सहमति कार्यान्वयनको लागि आफूहरू लागिरहेको बताइन् । ‘स्वास्थ्य मन्त्रालयले हामीसँग गरेको ११ बुँदे सहमति अझै कार्यान्वयन भएको छैन, हामी पनि मन्त्रालयमा दिनहुँ धाइरहेका छौं,’ संघको अध्यक्ष पोख्रेलले भनिन्, ‘हामी जसरी पनि सहमति कार्यान्वयन गराउन लगाएरै छाड्छौं, हाम्रो मागमा स्वास्थ्य मन्त्री पनि सकारात्मक हुनुहुन्छ ।’

गत पुस र माघ महिनामा संघको अगुवाइमा देशभरका नर्सहरू ९ दिनसम्म काम नै छाडेर आन्दोलित भएका थिए । नर्सहरू काम नै छाडेर आन्दोलनमा उत्रेपछि स्वास्थ्य मन्त्रालयका विशेषज्ञ डाक्टर विनोदमान श्रेष्ठको संयोजकत्वमा स्वास्थ्य मन्त्रालयद्वारा गठित वार्ता समिति र नेपाल नर्सिङ संघका पदाधिकारीबीच ११ बुँदे सहमति भएको थियो ।

यस्तो थियो सहमति :